ԲԴԽ-ում ներքին լարվածությունը խորանում է. գիտնական անդամները՝ ընդդեմ Արթուր Աթաբեկյանի՞. «Ժողովուրդ»

«Ժողովուրդ» օրաթերթը գրում է. «Բարձրագույն դատական խորհրդում ուշագրավ իրավիճակ է ձևավորվել։ Դատելով վերջին զարգացումներից՝ ԲԴԽ գիտնական անդամների զգալի մասը ոչ միայն չի կիսում խորհրդի նախագահի Արթուր Աթաբեկյանի մոտեցումները, այլև, դատական համակարգում շրջանառվող տեղեկությունների համաձայն, որոշ դեպքերում բացահայտ հակադրվում է նրան։

Դատական համակարգում վաղուց խոսակցություններ են շրջանառվում, որ ԲԴԽ գիտնական և դատավոր անդամների հարաբերությունները հեռու են ներդաշնակ լինելուց։ Ըստ այդ տեղեկությունների՝ երկու խմբերի միջև առկա տարաձայնություններն ու լարվածությունը ժամանակ առ ժամանակ արտացոլվում են ոչ միայն ներքին քննարկումներում, այլև խորհրդի որոշումներում և հրապարակային գործունեության մեջ։

Վերջին օրինակներից մեկը վերաբերում է Վերաքննիչ քրեական դատարանի դատավոր Ռոբերտ Պապոյանին։ ՀՀ արդարադատության նախարար Սրբուհի Գալյանը սկզբում միջնորդություն էր ներկայացրել Բարձրագույն դատական խորհուրդ՝ դատավորին կարգապահական պատասխանատվության ենթարկելու հարցով։ Սակայն հետագայում ի հայտ եկած հանգամանքների հիման վրա նախարարությունը նոր միջնորդություն է ներկայացրել՝ առաջարկելով մերժել հենց նույն կարգապահական վարույթի շրջանակում ներկայացված դիմումը։

Արդյունքում ԲԴԽ դատավոր անդամները՝ խորհրդի նախագահ Արթուր Աթաբեկյանի գլխավորությամբ, կողմ են քվեարկել արդարադատության նախարարության վերջին միջնորդությանը։ Մինչդեռ գիտնական անդամներ Կարեն Թումանյանը, Երանուհի Թումանյանցը, Աշոտ Հայրապետյանը, ինչպես նաև վարչական դատարանի դատավոր անդամ Մերի Համբարձումյանը դեմ են արտահայտվել և ներկայացրել հատուկ կարծիք։

Սակայն սա միակ դեպքը չէ, որն ակնհայտորեն վկայում է խորհրդի ներսում առկա լարվածության մասին։

«Ժողովուրդ» օրաթերթի տեղեկություններով՝ օրեր առաջ ԲԴԽ-ում բավականին թեժ մթնոլորտում է անցել Կոտայքի մարզի ընդհանուր իրավասության դատարանի դատավոր Արմեն Վարոսյանին կարգապահական պատասխանատվության ենթարկելու վերաբերյալ միջնորդության քննությունը։ Քննարկման ընթացքում, ըստ մեր աղբյուրների, գիտնական անդամներ Երանուհի Թումանյանցի և Կարեն Թումանյանի միջև լարված բանավեճ է ծավալվել ԲԴԽ դատավոր անդամ Արման Հովհաննիսյանի հետ։

Իրավիճակն այնքան է սրվել, որ քննարկմանը ստիպված է եղել միջամտել ԲԴԽ նախագահ Արթուր Աթաբեկյանը՝ փորձելով հանդարտեցնել մթնոլորտը և կանխել հետագա սրացումը։ Սակայն, մեր տեղեկություններով, նախագահի միջամտությունն ամբողջությամբ չի լուծել ստեղծված իրավիճակը, և քննարկումը շարունակվել է բավականին լարված պայմաններում։

Թե որքան խորն են ԲԴԽ ներսում առկա հակասությունները և ինչ ազդեցություն կարող են ունենալ դրանք խորհրդի հետագա գործունեության ու որոշումների վրա, առայժմ դժվար է ասել։ Սակայն ակնհայտ է, որ վերջին ամիսների զարգացումները ավելի տեսանելի են դարձրել այն տարաձայնությունները, որոնց մասին դատական համակարգում վաղուց էին խոսում»։