Ասում էին՝ Ռեմբո հոպար, սա քո տեղը չի. ազատամարտիկը պատմում է ՔԿՀ-ում անցկացրած 4 ամիսների մասին

Ապօրինի զենք, զինամթերք պահելու մեջ մեղադրվող ազատամարտիկ Ստեփան Ստեփանյանը (Ռեմբո), որը հուլիսի 6-ին արդարացվել է դատարանի վճռով, քրեակատարողական հիմնարկում անցկացրած 4 ամիսների ընթացքում առողջական նոր խնդիրներ է ձեռք բերել, դժվարությամբ է քայլում:

«Մի ոտքս ասկոլկեքից վնասված ա, լավ ա, բայց մյուս՝ առողջ ոտքս չեմ կարողանում շարժել: Երեւի որ էդքան պառկել, չեմ քայլել, դրանից է նաեւ: Պրագուլկա դուրս չէի գալիս, որովհետեւ դա իմ շրջապատը չէր: Հանցագործներ էին, մարդասպաններ, էդ թեմաներով էին խոսում, ես էլ ընդամենը պատերազմից բերած զենքի համար էի էնտեղ, ես իրենց հետ խոսելու բան չունեի: Իրենք հանցագործ էին, ես հացագործ»,- NEWS.am-ի հետ զրույցում պատմեց ազատամարտիկը՝ նշելով, որ դրա հետ մեկտեղ դատապարտյալներն իրեն հարգում էին. «Ասում էին՝ Ռեմբո հոպար, սա քո տեղը չի»:

Ազատամարտիկը նշեց, որ զենքերը, որոնք պահելու համար իրեն մեղադրանք էր առաջադրվել, պատերազմի ժամանակ հակառակորդից էր առգրավել, եւ այդ մասին ասել է դատավորին:

«Պատերազմի դաշտից հայթայթած, թուրքերից առգրաված զենքներն էին: Էդ զենքերը չէին օգտագործվելու հայերի դեմ: Ասեցի՝ սահմանամերձ գյուղում եմ ապրում, պահել եմ, որ եթե մի բան լինի, ես դրանցով գոնե կես ժամ դիմադրեմ, մինեւ կգայիք, կհասնեիք»,- ասաց Ստեփան Ստեփանյանը:

Հիշեցնենք, որ Ստեփան Ստեփանյանը անազատության մեջ էր փետրվարի 21-ից: