Լավագույն հակակնճիռային դիմակները. բաղադրատոմսեր

Ձեր ուշադրությանն ենք ներկայացնում  դիմակների բաղադրատոմսեր, որոնք խոնավեցնում ու երտասարդացնում են մաշկը, հարթեցնում մանր կնճիռներն ու ծալքերը:

Բաղադրությունը.

1 ճաշի գդալ կարտոֆիլի օսլա, 

100 գրամ ջուր, 

0,5 լիտր եռման ջուր, 

5 ճաշի գդալ գազարի թարմ քամած հյութ, 

1 ճաշի գդալ թթվասեր:

Պատրաստման եղանակը.

Օսլան լուծել 100 գրամ ջրում: Ավելացնել կես լիտր եռման ջուրը, դնել կրակին և եփել, մինչև թանձրանա: Հանել կրակի վրայից, ավելացնել գազարի հյութն ու թթվասերը և լավ խառնել:

Ստացված զանգվածը բարակ շերտով քսել նախապես մաքրած դեմքի մաշկին և թողնել 20-25 րոպե: Դիմակը մաքրել տաք ջրով, այնուհետև օգտագործել դեմքի քսուք:

Մնացած խառնուրդը (դիմակը բավական շատ է ստացվում) կարելի է օգտագործել երեք օրվա ընթացքում՝ պահելով սառնարանում:

Այս դիմակը շատ լավ հարթեցնում է մանր կնճիռներն ու ծալքերը և խոնավեցնում է մաշկը: Իր ազդեցությամբ այն նման է բոտոքսին: Ավելի լավ արդյունքի հասնելու համար դիմակն անհրաժեշտ է օգտագործել երեք օր շարունակ:

Չինական գեղեցկության դիմակ մեղրով, օսլայով ու աղով

Առաջարկում ենք շատ պարզ, բայց արդյունավետ մի դիմակ, որն օգտագործում են չինացի կանայք, ովքեր հայտնի են իրենց հարթ ու փայլուն մաշկով:

Այս դիմակը սնուցում է մաշկը, հավասարեցնում գույնը և զգալիորեն նվազեցնում պիգմենտային հետքերի առաջացումը:

Բաղադրությունը.

·         մեղր, 

·         օսլա, 

·         ծովի աղ:

Պատրաստման եղանակը.

Ոչ շատ մեծ տարրայի մեջ խառնել մեկ թեյի գդալ մեղրը (ցանկալի է հեղուկ մեղրը) և մեկ թեյի գդալ օսլան այնքան, մինչև դառնա սպիտակավուն համասեռ զանգված: Ավելացնել մեկ թեյի գդալ մանրացրած ծովի աղ (ծովի աղը կարելի է փոխարինել սովորական յոդացված աղով) և լավ խառնել: Եթե մաշկը գերզգայուն է կամ շատ չոր, ապա կարելի է ավելացնել նաև մեկ թեյի գդալ կաթ:

Դիմակը մի քանի շերտով քսել դեմքին, մինչև ամբողջ խառնուրդն օգտագործվի՝ խուսափելով շուրթերի և աչքերի շրջակայքի մաշկից, թողնել 25 րոպե և լվանալ: Տհաճ զգացողությունների դեպքում (քոր, ծակծկոց, այրոց և այլն) անհրաժեշտ է անմիջապես լվանալ մաշկը ջրով: Քանի որ դիմակի բաղադրության մեջ կա մեղր, ապա հնարավոր է նկատվի ալերգիկ ռեակցիա:

Այս դեպքում կարելի է օգտագործել ակացիայի մեղր, որը համարվում է մեղրի բելոր տեսակներից ամենահիպոալերգենը:

Առավելագույնս լավ արդյունքի հասնելու համար՝ խորհուրդ է տրվում այս դիմակն օգտագործել 20 օրում 10 անգամ (յուրաքանրյուր օգտագործումից հետո մեկ օր դադարներով): Այս չինական դիմակը կօգնի ձգել մաշկը և դարձնել այն առողջ, փայլուն ու հարթ:

Ժելատինով հակակնճիռային քսուք

Ժելատինն իր ձգող հատկության շնորհիվ օգտագործվում է կոսմետիկ դիմակներում, ինչպես նաև շամպուններում, եղունգներն ամրացնող նյութերում՝ որպես պրոտեինային հավելում: Այն բարելավում է մաշկի վիճակը, դրական ազդեցություն է ունենում մաշկի ամինաթթվային և սպիտակուցային փոխանակման վրա, հարթեցնում է մանր կնճիռները, փափկեցնում ու սպիտակեցնում է մաշկը և բարելավում է արյան շրջանառությունը:

Քսուքի պատրաստման եղանակը.

Քսուքը պատրաստելու համար հարկավոր է տարրայի մեջ լավ խառնել 1 լիքը թեյի գդալ ժելատինը, կես բաժակ ջուրը, 3 ճաշի գդալ մեղրը, կես բաժակ գլիցերինը և 1 գրամ (դանակի ծայրով) սալիցիլաթթուն:

Խառնուրդով տարրան դնել տաք ջրի մեջ և խառնել այնքան, մինչև դառնա համասեռ զանգված, այնուհետև հանել ջիրց և, անընդհատ հարելով, սառեցնել, որպեսզի դառնա դոնդողանման կրեմ: Կրեմն ամեն օր քնելուց 2 ժամ առաջ քսել մաշկին և թողնել 20 րոպե: Քսուքի մնացորդները մաքրել անձեռոցիկի օգնությամբ:

Ստացված քսուքը սովորաբար բավական է լինում մեկ ամսվա համար: Այդ ընթացքում այն կարելի է պահել սառնարանում: Օգտագործելուց առաջ հարկավոր է առանձնացնել անհրաժեշտ զանգվածը, մի փոքր տաքացնել և քսել մաշկին:

Ժելատինով դիմակներ՝ մաշկը երիտասարդացնելու համար

Ժելատինով դիմակներն օժտված են ուժեղ վերականգնեղ հատկությամբ, բարելավում են մաշկի գույնն ու արյան շրջանառությունը, ձգում, հարթեցնում, փափկեցնում ու առաձգական են դարձնում մաշկը: Դրանք ազատում են կնճիռներից, պիգմենտային հետքերից և պեպեններից:

Ժելատինով ու բանանով երիտասարդացնող դիմակ

Մեկ թեյի գդալ ժելատինին ավելացնել 2 ճաշի գդալ եռացրած ջուր և թողնել, որ ուռչի: Այնուհետև լուծված ժելատինին ավելացնել 2 թեյի գդալ բանանի խյուս, խառնել և քսել մաքուր մաշկին: Դիմակը թողնել 20 րոպե, այնուհետև լվանալ տաք ջրով:

Ժելատինով, գլիցերինով ու մեղրով հակակնճիռային դիմակ

4 ճաշի գդալ գլիցերինը, 2 թեյի գդալ մեղրը, 2 թեյի գդալ ժելատինն ու 4 ճաշի գդալ ջուրը խառնել, այնուհետև ստացված զանգվածը դնել թույլ կրակի վրա և անընդհատ խառնել, մինչև բոլոր բաղադրիչները լուծվեն:

Ավելացնել ևս 4 ճաշի գդալ եռացրած ջուր, խառնել և լցնել կափարիչով ստերիլ տարրայի մեջ: Դիմակը քսել դեմքին, թողնել 20 րոպե և լվանալուց հետո քսել դեմքի քսուք: Այս դիմակը կարելի է երկար ժամանակ պահել սառնարանում:

Նյութի աղբյուրը՝ med.tert.am