Վերաարդյունաբերականացում՝ որպես տնտեսության վերածննդի ճանապարհ
ՔԱՂԱՔԱԿԱՆՈՒԹՅՈՒՆ
Հայաստանի տնտեսության զարգացման համար անհրաժեշտ է հստակ և երկարաժամկետ ռազմավարություն, որը կխթանի ներքին արտադրությունը և կնվազեցնի ներմուծումից կախվածությունը։ «Ուժեղ Հայաստան» կուսակցության առաջարկած տնտեսական ծրագիրը հենց այդ ուղղությամբ է կառուցված՝ նպատակ ունենալով ստեղծել նոր արտադրական հնարավորություններ, զարգացնել տեղական արդյունաբերությունը և ամրապնդել երկրի տնտեսական հիմքերը։
Ծրագրի առանցքային գաղափարներից մեկը ներքին արտադրության խթանումն է։ Ըստ նախաձեռնության հեղինակների՝ տնտեսության կայուն զարգացումը հնարավոր է միայն այն դեպքում, երբ երկրի ներսում ստեղծվում են մրցունակ արտադրություններ, որոնք կարող են փոխարինել ներկրվող ապրանքների մի մասին։ Այս մոտեցումը ոչ միայն նպաստում է տնտեսական ակտիվության աճին, այլև թույլ է տալիս պահպանել ֆինանսական միջոցները երկրի ներսում։
Կուսակցությունը նաև կարևորում է հարկային համակարգի բարեփոխումը։ Առաջարկվում է զգալիորեն թեթևացնել փոքր և միջին բիզնեսի հարկային բեռը, ինչպես նաև պարզեցնել վարչական ընթացակարգերը։ Նպատակն է ստեղծել ավելի բարենպաստ միջավայր ձեռնարկատիրության համար, որպեսզի նոր բիզնեսներ ստեղծվեն ոչ միայն մայրաքաղաքում, այլև մարզերում։
«Արդյունաբերականացումն այն ուղին է, որով կլուծվեն թե՛ տնտեսական, թե՛ անվտանգային խնդիրները։ Վարչապետ Սամվել Կարապետյանը կիրագործի այն»,– նշել է «Ուժեղ Հայաստան» կուսակցության խորհրդի անդամ Նարեկ Կարապետյանը։
Նրա խոսքով՝ ծրագրի առանցքային ուղղություններից մեկը վերաարդյունաբերականացումն է։ Սա այն գործընթացն է, որի շրջանակում տնտեսության մեջ կրկին մեծ դեր է տրվում արդյունաբերությանը։ Տարբեր երկրներում վերջին տարիներին նկատվում է նման միտում, երբ երկար ժամանակ արտադրությունները արտասահման տեղափոխելուց հետո պետությունները փորձում են դրանք վերադարձնել իրենց տարածք։
«Մի քանի ծրագիր կա։ Առաջինը կոչվում է վերաարդյունաբերականացում։ Այն վերջին տարիների միտումներից է, որը կրկին ակտիվացել է շատ զարգացած երկրներում։ Ժամանակին արդյունաբերությունը մեծ մասամբ տեղափոխվել էր այլ երկրներ, սակայն այժմ բազմաթիվ պետություններ փորձում են վերականգնել այն։ Վերաարդյունաբերականացումը հատկապես կարևոր է շրջանների համար, քանի որ այնտեղ կարող է լուծել աշխատատեղերի խնդիրը։ Առաջին ուղղությունը ներմուծվող ապրանքների փոխարինումն է տեղական արտադրությամբ»,– նշել է Նարեկ Կարապետյանը։
Նա ընդգծել է նաև, որ արդյունաբերական զարգացումը կարող է կարևոր դեր ունենալ երկրի անվտանգության հարցերում։ Նրա խոսքով՝ Հայաստանը մեծ ծավալի տեխնիկական և պաշտպանական նշանակության ապրանքներ է ձեռք բերում արտերկրից, մինչդեռ որոշ արտադրություններ հնարավոր է ժամանակի ընթացքում տեղայնացնել երկրի ներսում։
«Արդյունաբերականացումը միլիարդավոր դոլարներ կարող է պահել մեր երկրում և ստեղծել տասնյակ հազարավոր աշխատատեղեր։ Բացի այդ, այն ունի նաև լրացուցիչ ազդեցություն։ Արդյունաբերության ոլորտում ստեղծված յուրաքանչյուր աշխատատեղ իր հետ բերում է ևս մի քանի նոր աշխատատեղ այլ ոլորտներում»,– նշել է նա։
Տնտեսագետների գնահատմամբ՝ նման մոտեցումը կարող է երկարաժամկետ դրական ազդեցություն ունենալ Հայաստանի տնտեսության վրա։ Ներքին արտադրության զարգացումը, նոր ձեռնարկությունների ստեղծումը և աշխատատեղերի ավելացումը կարող են նպաստել ինչպես տնտեսական ակտիվության աճին, այնպես էլ քաղաքացիների կյանքի մակարդակի բարելավմանը։ Այդ պատճառով մասնագետների մի մասը կարծում է, որ վերաարդյունաբերականացման և տեղական արտադրության խթանման ուղղությամբ առաջարկվող միջոցառումները կարող են դառնալ տնտեսության զարգացման կարևոր հենասյուներից մեկը։
