Ամստերդամի հրեական դպրոցում պայթյուն է որոտացել․ Reuters
ՄԻՋԱԶԳԱՅԻՆ
Շաբաթ օրը վաղ առավոտյան Ամստերդամի հրեական դպրոցներից մեկում պայթյուն է որոտացել, որը քաղաքապետը որակել է որպես «միտումնավոր հարձակում հրեական համայնքի դեմ», հայտնում է Reuters-ը։
Ինչպես հայտնել է քաղաքապետ Ֆեմկե Հալսեման, Ամստերդամի հարավում գտնվող հեղինակավոր բնակելի թաղամասի դպրոցում տեղի ունեցած պայթյունը միայն սահմանափակ վնաս է հասցրել, քանի որ ոստիկանությունն ու հրշեջները արագորեն ժամանել են դեպքի վայր։
Տուժածների մասին տեղեկություններ չեն հաղորդվում։
Հայտնի է, որ Ամստերդամի սինագոգներում և հրեական հաստատություններում անվտանգության միջոցառումներն արդեն իսկ խստացվել էին՝ ուրբաթ գիշերը Ռոտերդամի կենտրոնում գտնվող սինագոգի հրկիզումից հետո։
Հարևան Բելգիայում տիրող իրավիճակը նույնպես լարված է. երկուշաբթի օրը Լիեժի սինագոգում տեղի ունեցած պայթյունի հետևանքով հրդեհ է բռնկվել։
«Սա վախկոտ ագրեսիվ գործողություն է հրեական համայնքի դեմ», - հայտարարել է Հալսեման։
«Ամստերդամի հրեաներն ավելի ու ավելի հաճախ են բախվում հակասեմականության դրսևորումների։ Սա անընդունելի է», - հավելել է քաղաքապետը։
Աշխարհի տարբեր երկրներում հրեական համայնքների դեմ հնարավոր հարձակումների վերաբերյալ մտավախությունները կտրուկ աճել են Իրանի դեմ ԱՄՆ-ի և Իսրայելի իրականացրած գործողություններից ու Թեհրանի պատասխան արձագանքից հետո։
