Հայտնի սննդաբանը ներկայացրել է լավագույն «աստղային» դիետաներն ու դրանց թերությունները

Ավելորդ քաշի դեմ պայքարում համաշխարհային աստղերը հաճախ արդյունավետ, սակայն դաժան մեթոդներ են կիրառում, որոնց բացասական հետևանքները կարող են  ավելի շատ լինել, քան դրականները: Սննդաբան Քսենիա Սելեզնյովան  ներկայացրել է ամենատարածված դիետաներն ու դրանց թերությունները:

Նիկոլ Քիդման. դետոքսիկացիա

Դերասանուհին խորհուրդ է տալիս երկու շաբաթը մեկ օրգանիզմը մաքրել տոքսիններից: Այդ դեպքում նա երեք օր ոչինչ չի ուտում և խմում է միայն բուսական թեյեր ու թարմ քամած հյութեր: Քիդմանը վստահ է, որ դրանք ոչ միայն ազատում են ավելորդ կիլոգրամներից, այլև շատ առողջարար են:

Սննդաբանը նշում է, որ սա լավ միտք է, քանի որ դետոքսիկացիան շատ կարևոր է բոլորի համար, սակայն երեք օրվա ընթացքում հնարավոր չէ օրգանիզմն ամբողջությամբ մաքրել տոքսիններից, քանի որ համալիր մաքրման համար հարկավոր է գոնե 10-14 օր: Դետոքսիկացիան իսկապես կօգնի ազատվել ավելորդ կիլոգրամներից, սակայն ոչ երեք օրում:

Միլա Յովովիչ. մեծ քանակությամբ հեղուկ

Միլա Յովովիչի սննդակարգի հիմքում մեծ քանակությամբ հեղուկն է: Դերասանուհին օրական երկու լիտր ջուր է խմում և նշում է, որ դա կազմվածքի պահպանման լավագույն մեթոդներից է:

Բժիշկ Սելեզնյովայի խոսքով՝ մեծ քանակությամբ հեղուկն իսկապես նպաստում է նիհարելուն, սակայն օրական երկու լիտր ջուր խմելն «դիետոլոգիական» ամենահայտնի սխալներից է: Բանն այն է, որ ջրի նորման շատ անհատական է: Օրինակ 145 կգ կշռող տղամարդուն ու 45 կգ կշռող բարեկազմ աղջկան չի կարող նույնքան հեղուկ հարկավոր լինել: Սակայն ջրի անհատական նորման որոշելը շատ հեշտ է: Սովորաբար մարմնի զանգվածի 1 կգ դիմաց հաշվվում է 30-40 մլ ջուր: Այսպիսով՝  70 կգ կշռով մարդը պետք է օրական խմի 2.1 լիտր ջուր (70×30 = 2100): Ընդ որում՝ ջրից բացի մյուս ըմպելիքները չեն հաշվվում:

Ջենիֆեր Էնիսթոն. մանկական սնունդ

Դերասանուհին տարբեր սննդակարգեր է փորձել, որոնցից մեկն էլ հիմնված է խյուսանման սննդի վրա: Նա դիետայի ամբողջ ընթացքում օգտագործում է միայն սմուզիներ, խյուս-ապուրներ և այլ ուտեստներ, որոնք պատրաստելիս հարկավոր է մանրացնել: Ընդ որում՝ այս սննդակարգը բացառում է յուղերն ու համեմունքները:

Սակայն, չնայած, որ սնունդը հարկավոր է լավ ծամել, հասուն մարդը չպետք է ստանա միայն մանրացրած սնունդ: Մարդու սննդակարգում պետք է լինեն նաև բանջարեղենից, մրգերից ու հացահատիկներից ստացված կոշտ մանրաթելեր: Բացի այդ, չի կարելի նաև սննդակարգից բացառել բուսայուղերը, քանի որ դրանք ճարպերը քայքայող վիտամինների ու հակաօքսիդանտների աղբյուր են:

Մելիսա ՄքՔարթի. ածխաջրերի ցածր պարունակությամբ դիետա

Հայտնի դերասանուհին ազատվել է 20 կգ ավելորդ քաշից՝ շնորհիվ ածխաջրերի ցածր պարունակությամբ դիետայի, որի ժամանակ նա խստորեն սահմանափակում էր սնունդը:

Այս դիետան կարող է արդյունավետ լինել, սակայն այն խիստ վտանգավոր է օրգանիզմի համար: Սննդաբանի խոսքով՝ ոչ մի դեպքում չի կարելի հետևել նման սննդակարգին, քանի որ դա հակասում է բնության կանոններին: Մարդու սննդակարգում պետք է լինեն բավարար քանակությամբ սպիտակուցներ, ճարպեր ու ածխաջրեր: Խորհուրդ չի տրվում նաև երկար ժամանակ միայն սպիտակուցներ օգտագործել, քանի որ այդ դեպքում կարող է բարձրանալ արյան մեջ միզաթթվի մակարդակը: Հարկ է հիշել, որ ածխաջրերը էներգիայի աղբյուրն են և սննդակարգում դրանց քնակությունը սահմանափակելը վաղ թե ուշ կհանգեցնի նյարդային պոռթկման ու մի շարք այլ բարդությունների:

Նյութի աղբյուրը՝ med.tert.am