Գերմանիան ցանկանում է ավելի խորը և արդար տնտեսական համագործակցություն Չինաստանի հետ. Գերմանիայի կանցլեր
ՏՆՏԵՍՈՒԹՅՈՒՆ
Չինաստանը և Գերմանիան ցանկանում են խորացնել համագործակցությունը, չորեքշաբթի օրը Պեկինում հայտարարել են Գերմանիայի կանցլեր Ֆրիդրիխ Մերցը և Չինաստանի պետական խորհրդի պրեմիեր Լի Ցյանը, հայտնում է Ռոյթերս-ը:
Մերցը Լիին ասել է, որ Գերմանիան մեծ նշանակություն է տալիս Չինաստանի՝ անցյալ տարվա իր խոշորագույն առևտրային գործընկերոջ հետ ինտենսիվ տնտեսական փոխանակումների պահպանմանը և խորացմանը՝ միևնույն ժամանակ ընդգծելով արդար համագործակցության և բաց հաղորդակցության ապահովման անհրաժեշտությունը:
«Մենք ունենք շատ կոնկրետ մտահոգություններ մեր համագործակցության վերաբերյալ, որոնք ցանկանում ենք բարելավել և դարձնել արդար»,- ասել է Մերցը, ով բախվում է տնտեսական հարաբերությունների վերասահմանման բարդ խնդրին, որոնք գնալով ավելի անբարենպաստ են դառնում գերմանական շահերի համար:
Լին երկու կողմերին կոչ է արել միասին աշխատել բազմակողմանիությունն ու ազատ առևտուրը պաշտպանելու համար՝ նկատի ունենալով ԱՄՆ նախագահ Դոնալդ Թրամփի առևտրային պատերազմը, որը տակնուվրա է արել համաշխարհային առևտրային համակարգը:
«Չինաստանը և Գերմանիան՝ որպես աշխարհի խոշորագույն տնտեսություններից երկուսը և կարևոր ազդեցություն ունեցող խոշոր պետություններ, պետք է ամրապնդեն վստահությունը համագործակցության նկատմամբ, համատեղ պաշտպանեն բազմակողմանիությունն ու ազատ առևտուրը և ձգտեն կառուցել ավելի արդար և հավասար համաշխարհային կառավարման համակարգ»,- ասել է Լին:
Չինաստանը ձգտում է ներկայանալ որպես հուսալի տնտեսական գործընկեր՝ ի հակադրություն Միացյալ Նահանգների, մինչդեռ Եվրոպան պայքարում է իր մատակարարման շղթաների խոցելիությունը վերացնելու համար և անհանգստանում է Չինաստանից աճող կախվածության պատճառով:
Եվրոպայի խոշորագույն տնտեսության և Չինաստանի միջև փոխգործակցությունը կարող է հիմք հանդիսանալ այս տարվա ԵՄ-Չինաստան հարաբերությունների համար:
