Մեծ Բրիտանիայի վարչապետը հայտնվել է նոր քաղաքական ճգնաժամի կենտրոնում

Մեծ Բրիտանիայի Լեյբորիստական ​​կուսակցությունը հայտնվել է խոշոր քաղաքական սկանդալի կենտրոնում՝ պաշտոնյաների անձնական էլեկտրոնային նամակների հրապարակումից հետո, որոնք կապված են Ջեֆֆրի Էպշտեյնի վաղեմի ծանոթ Փիթեր Մանդելսոնի՝ ԱՄՆ-ում դեսպան նշանակման հետ։

Կուսակցության ղեկավարությունը պահանջում է վարչապետ Քեյր Սթարմերի հրաժարականը՝ մեղադրելով նրան ապացույցները թաքցնելու փորձի մեջ։

Վարչապետն հրաժարական չի տալիս ու խոստացել է փոխել իր կաբինետի կառավարման ոճը։

ԱՄՆ Արդարադատության նախարարության կողմից ամերիկացի ֆինանսիստ Ջեֆֆրի Էպշտեյնին պատկանող միլիոնավոր արխիվային ֆայլերի հրապարակումից հետո լրագրողները դրանց մեջ հայտնաբերել են կոմպրոմատային նյութեր, այդ թվում՝ ԱՄՆ-ում Մեծ Բրիտանիայի դեսպան Փիթեր Մանդելսոնի մասին։

Համացանցում հրապարակված լուսանկարներում նա երևում է միլիարդատիրոջ կղզում, խալաթով։

Մանդելսոնը նախկինում աշխատել է որպես Եվրոպական առևտրի հանձնակատար և համարվում էր Լեյբորիստական ​​կուսակցության ամենաազդեցիկ քաղաքական գործիչներից մեկը։ Անցյալ տարվա սեպտեմբերին Մեծ Բրիտանիայի Արտաքին գործերի, համագործակցության և զարգացման գրասենյակը չեղյալ էր հայտարարել նրա դիվանագիտական ​​հավատարմագրերը՝ կապված Էպշտեյնի հետաքննության հետ։ Փետրվարին նախկին դեսպանի դեմ քրեական գործ է հարուցվել, իսկ փետրվարի 1-ին Մանդելսոնը հեռացել է կուսակցությունից։

Փետրվարի 8-ին վարչապետի աշխատակազմի ղեկավար Մորգան ՄաքՍվինին հրաժարական էր տվել՝ ստանձնելով Մանդելսոնի նշանակման պատասխանատվությունը։ Հրաժարական էր տվել նաև վարչապետի հաղորդակցության տնօրեն Թիմ Ալանը։

Բացի այդ, Մեծ Բրիտանիայի վարչապետը հայտնվել է նոր քաղաքական ճգնաժամի կենտրոնում՝ այս անգամ իր նախկին հաղորդակցության տնօրեն Մեթյու Դոյլի պատճառով, գրել են ԶԼՄ-ները։

Ոչ միայն ընդդիմությունը, այլև իշխող Լեյբորիստական ​​կուսակցության գործընկերները հարցականի տակ են դնում, թե ինչպես կարող էր Դոյլը նշանակվել Մեծ Բրիտանիայի խորհրդարանի Լորդերի պալատում (վերին պալատ), չնայած նախկինում դատապարտված պեդոֆիլի և Լեյբորիստական ​​կուսակցության նախկին խորհրդական Շոն Մորգանի հետ ունեցած կապերին։

Ընդդիմադիր Պահպանողական կուսակցության առաջնորդ Քեմի Բադնոկը մեղադրել է Սթարմերին «կառավարությունը երեսպաշտներով և պեդոֆիլներին արդարացնողներով լցնելու» մեջ։

Լեյբորիստական ​​կուսակցության փոխնախագահ Լյուսի Փաուելը կոչ է արել կուսակցությանը «փոխել որոշումների կայացման մշակույթը»։ Նա նաև վստահեցրեց, որ Դոյլի դեմ ոչ միայն կուսակցական հետաքննություն է սկսվել, այլև «կհետևեն հետագա պատժամիջոցներ»։

Սթարմերը խորհրդարանում բացատրել է, որ Դոյլը լիովին չի բացահայտել իր հարաբերությունները Մորգանի հետ։ Նա խորհրդականի համար քարոզարշավ էր անցկացրել 2017 թվականին, նախքան Մորգանի դատապարտվելը։

Այնուամենայնիվ, վարչապետի գրասենյակի աղբյուրները «The Daily Telegraph»-ին հայտնել են, որ դեկտեմբերի վերջին վարչապետն արդեն տեղյակ է եղել իր նախկին հաղորդակցության տնօրենի՝ Մորգանի հետ փոխազդեցությունների մասին։ Չնայած դրան՝ Լորդերի պալատի նշանակման հրամանագիրը, որը հրապարակվել էր կարճ ժամանակ առաջ, չեղյալ չէր հայտարարվել, և Դոյլը հունվարին բարձրացել էր խորհրդարանի վերին պալատ։ Սթարմերն ունեցել է երկու շաբաթ իրավիճակը շտկելու համար, բայց չի կարողացել դա անել։