Հայաստանը շտապեցնում է Ռուսաստանին վերանորոգելու դեպի Ադրբեջան և Թուրքիա երկաթուղիները

Հայաստանը չի կարող ինքնուրույն վերականգնել երկաթուղային գծերը մինչև Ադրբեջանի և Թուրքիայի սահմանները և պլանավորում է դա անել Ռուսաստանի հետ համատեղ՝ հնարավորինս շուտ, հայտարարել է ՀՀ տարածքային կառավարման և ենթակառուցվածքների նախարար Դավիթ Խուդաթյանը, գրում է vestikavkaza.ru–ն։

«Հայաստանը շարունակում է բանակցությունները Ռուսաստանի հետ Իջևանի և Ախուրիկի երկաթուղային հատվածների վերականգնման վերաբերյալ։ Մենք հասկանում ենք, որ այդ հատվածներում վերականգնման աշխատանքները կիրականացվեն ռուսական կողմի հետ համատեղ, այսինքն նրա անմիջական մասնակցությամբ», - ասում է նա։

ՀՀ վարչապետ Նիկոլ Փաշինյանն արդեն հանձնարարել է Հարավկովկասյան երկաթուղուն (ՀԿԵ) շտապ վերականգնել Ադրբեջան և Թուրքիա տանող սահմանային երկաթուղային հատվածները՝ Երասխից մինչև Նախիջևանի ադրբեջանական սահմանը և Ախուրիկից մինչև Թուրքիայի սահմանը, հաղորդել է «Սպուտնիկ Արմենիան»։ Նախագիծը, որը նախատեսում է վերականգնել Հայաստանում նախկինում նորմալ գործող երկաթուղային ծառայությունը, հայկական կողմի պահպանողական գնահատականներով կարժենա մոտ 500 միլիոն դոլար։

Ինչո՞ւ է Հայաստանն այդքան շտապում։ Հարավային Կովկասի փորձագետ Կոնստանտին Տասիցը, vestikavkaza.ru-ի թղթակցի հետ զրույցում նշել է, որ Հայաստանը ցանկանում է որքան հնարավոր է արագ հաստատել ուղիղ կապ Ադրբեջանի և Թուրքիայի հետ, բայց չունի անհրաժեշտ ռեսուրսներ և, հետևաբար, դիմում է Ռուսաստանին։ «Ամենայն հավանականությամբ, հայկական կողմի նման շտապողականությունը պայմանավորված է Հայաստանի և Ադրբեջանի միջև հաղորդակցությունների բացման վերաբերյալ բանակցություններում առաջընթացով։ Երևանը ակնկալում է, որ մոտ ապագայում կկնքվեն ուղիղ տրանսպորտային կապերի գործարկման վերաբերյալ համաձայնություններ, և մինչ այդ անհրաժեշտ են պատրաստի երկաթուղային գծեր, որոնք ներկայումս բացակայում են։ Քանի որ դուստր  «Հայկական երկաթուղիները» կառավարվում են «Ռուսական երկաթուղիների» ընկերության կողմից, Հայաստանի իշխանությունները ակնկալում են, որ «Ռուսական երկաթուղիները» կկառուցեն այդ գծերը մինչև Թուրքիայի և Ադրբեջանի սահմանները», - ասել է նա։

Իսկ ինչպե՞ս կարձագանքի Ռուսաստանը։ Տարածաշրջանային փորձագետը ընդգծել է, որ Ռուսաստանի ղեկավարությունը կքննարկի Երևանի առաջարկը առևտրային տեսանկյունից։ «Նախ, անհրաժեշտ է ստանալ նախագծերի իրագործելիության ուսումնասիրություն: Տեղում մասնագետները պետք է կատարեն համապատասխան աշխատանքներ՝ ներդրումների ծավալը և փոխհատուցման ժամկետը հաշվարկելու համար: Հայկական կողմից այս փաստաթղթերի վերաբերյալ դեռևս տեղեկատվություն չկա», - նշել է Կոնստանտին Տասիցը:

«Ընդհանուր առմամբ, Երևանի սպասումների համաձայն, նախագծային աշխատանքները կսկսվեն միայն 2026 թվականի վերջին: Համապատասխանաբար, ճանապարհները կկառուցվեն առնվազն ևս երկու տարի: Այս համատեքստում մենք պետք է հասկանանք, թե ինչպես է այս ամենը կազմակերպվելու, որպեսզի տարբեր հատվածների շահագործման հանձնումը համաժամեցված լինի և որոշ հատվածներ անգործ չթողնի», - եզրափակել է Հարավային Կովկասի փորձագետը:

Նյութը հրապարակման պատրաստեց Կամո Խաչիկյանը

www.1or.am