ՔՊ-ականները լարված օրեր են ապրում. «Ժողովուրդ»

«Ժողովուրդ» օրաթերթը գրում է. ««Ժողովուրդ» օրաթերթի տեղեկությունների համաձայն՝ ՔՊ վարչության գրեթե ամեն նիստի ժամանակ կամ նախաձեռնող նիստերին Նիկոլ Փաշինյանը ՔՊ 2026 թվականի խորհրդարանական ընտրությունների նախընտրական ցուցակի հետ կապված նոր առաջարկ է անում։ Իսկ ՔՊ-ականներն էլ, բնականաբար, համաձայնվում են՝ ելք չունեն։

Իշխանականները «Ժողովուրդ» օրաթերթի հետ մասնավոր զրույցներում նշում են, որ Փաշինյանն այնպես է իրավիճակը լարել, որ ոչ մի ՔՊ-ական պատկերացում չունի, թե իրեն հունիսի 7-ից հետո ինչ ապագա է սպասվում։

Հիմա էլ նոր քվեաթերթիկի տարբերակ են որոշում ՔՊ-ականները, որով, ըստ Փաշինյանի, պետք է թափանցիկ ընտրություններ կազմակերպեն կուսակցության ներսում։

«Ժողովուրդ»-ի հետ մասնավոր զրույցներում ՔՊ-ականները բողոքում են նաև ֆեյսբուքյան տարբերակով քարոզարշավ անելու գաղափարից, որը, ըստ ՔՊ-ականների, որևէ ձևով իրենց չի օգնելու ընտրվել։

Հիշեցնենք, որ որոշվել է՝ այն անձինք, որոնք ընդգրկված են ՔՊ-ի նախնական՝ 280 հոգանոց ցուցակում, այս օրերին պարտավորվել են իրենց սոցիալական հարթակներում իրականացնել ակտիվ քարոզչություն։

Ըստ մեզ հասած տեղեկությունների՝ ցուցակի հավակնորդներին հանձնարարական է տրվել հրապարակային ձևաչափով ներկայացնել իրենց քաղաքական նպատակները, հիմնավորել պատգամավոր դառնալու ցանկությունը և խոսել իշխանության ներսում իրենց պատկերացվող դերի մասին։

Նշվում է, որ այս գործընթացը կտևի մինչև փետրվարի 12-ը, որից հետո ՔՊ-ի 1000 պատվիրակները նախնական ցուցակից կընտրեն «թոփ» 50 թեկնածուներին։ Վերջիններս արդեն կուղարկվեն հաջորդ փուլ՝ մարզային և ներհամայնքային քարոզչության, որի արդյունքներով էլ վերջնականապես կձևավորվեն ցուցակի առաջին 50 տեղերը»։

Մանրամասները՝ «Ժողովուրդ» օրաթերթի այսօրվա համարում: