Հայաստանում 100-ամյա քաղաքացիներին կտրամադրվի 1 մլն դրամ
ՀԱՍԱՐԱԿՈՒԹՅՈՒՆ
Հայաստանի ամբողջ տարածքում բնակվող 71 քաղաքացիները, որոնց 100 տարին լրացել է կամ լրանա այս տարի, 2026 թվականին պետական մակարդակով կստանան հարգանքի և աջակցության նյութական արտահայտություն՝ միանվագ 1 մլն դրամի չափով։ Համապատասխան որոշումն ընդունվել է ՀՀ կառավարության այսօրվա նիստի ընթացքում։
Որոշման մեջ նշվում է, որ նպատակն է երախտագիտության և հարգանքի խորհրդանշական դրսևորում ցուցաբերել այն անձանց նկատմամբ, որոնք կյանքի մեկ դարը նվիրել են իրենց ընտանիքին, պետությանը, հայրենիքին, աշխատանքին ու հանրությանը։
«Այս նախաձեռնությունը, բացի ֆինանսական բաղադրիչից, բարոյական գնահատանք է մի ամբողջ սերնդի, որն ապրել է մեր ժողովրդի ամենատարբեր կենսափուլերում, այդ թվում՝ ծանր փորձություններով լի ժամանակաշրջաններում` Հայրենական մեծ պատերազմ, հետպատերազմական բարդ շրջան, երկրաշարժ, 1990-ականների ծանր պատերազմական ժամանակահատված, սոցիալ-տնտեսական ու քաղաքական տրանսֆորմացիաներ։ Այս մարդիկ մեր ազգային հիշողության կենդանի կրողներն են, նրանց կենսագրությունը՝ մեր պատմության մի մասնիկը»,– ասված է որոշման հիմնավորման մեջ։
Միաժամանակ նշվում է, որ միանվագ գումարը չի տրամադրվի այն անձին, որը կորցրել է կենսաթոշակ ստանալու իրավունքը, ինչպես նաև գումարը չի վճարվի նրա մահվան դեպքում։ Միանվագ աջակցություն չի տրամադրվի նաև այն քաղաքացիներին, որոնք Երևանի ավագանու որոշմամբ արդեն ստացել են այս աջակցությունը։
