Աշոտյան. Հայաստան-Ռուսաստան հարաբերություններում բացակայում է անկեղծ և լուրջ երկխոսությունը

ՀՀԿ փոխնախագահ Արմեն Աշոտյանը հայտարարել է, որ Հայաստանի և Ռուսաստանի միջև հարաբերություններում բացակայում է լուրջ, անկեղծ և սրտանց երկխոսությունը, հաղորդել է «Սպուտնիկ Արմենիան», գրում է ritmeurasia.ru–ն։

Նա իր այդ գնահատականն է տվել ռուս հեռուստահաղորդավար Վլադիմիր Սոլովյովի հակասական հայտարարություններին ի պատասխան, որոնք լայն քննարկումներ են առաջացրել Երևանում։

Քաղաքական գործչի խոսքով հայ հասարակությունը բաժանված է երկու ծայրահեղության. մի կողմը ճնշված է չափազանց «ֆիլիզմով» (չափազանց հիացմունքով), իսկ մյուս չափազանց և, նրա կարծիքով, վճարովի «ֆոբիայով»։ Այս բևեռների միջև, նշել է Աշոտյանը, գոյություն ունի իսկական բարեկամություն, ռազմավարական դաշինք, ընդհանուր պատմություն, մշակույթ և ապագա։ Սակայն հայ-ռուսական հարաբերությունների «աղը» կորչում է բևեռացման մեջ, ինչը թույլ է տալիս որոշներին շահույթ ստանալ դրանից։ Նա նաև տարակուսանք է հայտնել Սոլովյովի մոտեցման մեջ նրբության բացակայության վերաբերյալ հիշեցնելով, որ «արևելքը նուրբ հարց է»։ Աշոտյանը ընդգծել է, որ Ռուսաստանի ներկայացուցիչները իրենց անհաջող հայտարարություններով չպետք է Հայաստանում ռուսաֆոբիայի նոր ալիք առաջացնեն, ինչը նա անվանել է «սրիկաների վերջին ամրոց»։

Հիշեցնենք, որ Սոլովյովն ավելի վաղ իր ելույթում հայտարարել էր, որ Ռուսաստանի կողմից Հայաստանում և Կենտրոնական Ասիայի երկրներում ազդեցության կորուստը անընդունելի է և զուգահեռներ է անցկացրել Ուկրաինայում հատուկ գործողության և Ռուսաստանի ազդեցության ոլորտի այլ երկրներում հնարավոր նմանատիպ գործողությունների միջև։