Փաշինյանը Ալիևին առաջարկել է մոռանալ Ղարաբաղի և «Արևմտյան Ադրբեջանի» մասին

ՀՀ վարչապետ Նիկոլ Փաշինյանը որոշել է խուսափել Ադրբեջանի նախագահ Իլհամ Ալիևի հետ հնարավոր հակամարտություններից։ Դրա համար նա առաջարկել է փակել ոչ միայն Ղարաբաղի, այլ նաև «Արևմտյան Ադրբեջանի» (ինչպես Բաքուն սիրում է անվանել Հայաստանի մի մասը) հարցը, գրում է yugsn.ru–ն։ Նա նույնիսկ առաջարկել է մշակել ճանապարհային քարտեզ։ «Ղարաբաղյան հարցի շարունակությունը նշանակում է նոր պատերազմ, նոր զոհեր, նոր դժվարություններ, նոր շրջափակում՝ իր անկանխատեսելի հետևանքներով։ Նրանք, ովքեր ասում են, որ Ղարաբաղի հարցը լուծված չէ, ըստ էության հայտարարում են, որ Հայաստանը պետք է նոր պատերազմ սանձազերծի», - Փաշինյանի խոսքերն է մեջբերել «Սպուտնիկ Արմենիան»։

Բայց Ադրբեջանի արտաքին գործերի նախարարությունը, ինչպես վերջերս պարզվեց, դժգոհ է Հայաստան-ԵՄ գործընկերության նոր օրակարգից, քանի որ այն «հակասում է Ադրբեջանի հետ խաղաղության գործընթացին»։ Բանն այն է, որ նոր փաստաթղթում ներառված է «ղարաբաղցի հայերը տեղահանվել են Ադրբեջանի ռազմական գործողությունների պատճառով» արտահայտությունը։ Բաքուն դա անընդունելի է համարում։ Փաշինյանը, ըստ երևույթին, նույնպես համաձայն է դրա հետ, նրա կարծիքով, Ղարաբաղի հայերը իրավունք չունեն վերադառնալու։ «Ես նաև մեր ղարաբաղցիներին ասացի, որ նրանց վերադարձը անիրատեսական է։ Եթե մենք շարունակենք վերադարձի օրակարգը, դա կնշանակի, որ մենք վերսկսում ենք ղարաբաղյան շարժումը։ Մինչդեռ ես արդեն հայտարարել եմ, որ մենք չպետք է շարունակենք ղարաբաղյան շարժումը։ Ղարաբաղյան շարժումն ավարտվել է, և այն վերակենդանացնելու փորձերը ապարդյուն կլինեն։ Մյուս կողմից, Հայաստանում լսում են, թե ինչպես է Բաքուն անընդհատ օգտագործում «Արևմտյան Ադրբեջան» անհասկանալի տերմինը», - բացատրել է Փաշինյանը։

Նյութը հրապարակման պատրաստեց Կամո Խաչիկյանը

www.1or.am