Ինչու է Նիկիտա Սիմոնյանը մաhվանից մոտ երկու տարի առաջ փոխել հայրանունը․ դուստրը բացահայտել է պատճառը
ՍՊՈՐՏ
Լեգենդար ֆուտբոլիստ և մարզիչ Նիկիտա Սիմոնյանի դուստրը՝ Վիկտորյան, «Sport-Express»-ի հետ զրույցում ուշագրավ մանրամասներ է պատմել այն մասին, թե ինչպես է հայրը ժամանակի ընթացքում Մկրտիչ Պողոսի Սիմոնյանից վերածվել Նիկիտա Պավլովիչի։
Պարզվում է՝ փաստաթղթային վերջնական փոփոխությունը տեղի է ունեցել բոլորովին վերջերս։
-Վիկտորյա, Ձեր հայրը երբևէ պատմե՞լ է, թե ինչպես Մկրտիչ Պողոսովիչից դարձավ Նիկիտա Պավլովիչ։
«Դա տեղի է ունեցել շատ բնական ճանապարհով։ Ժամանակին լուրեր էին պտտվում, թե իբր հայրս հրաժարվել է իր իսկական անունից, բայց դա իրականությանը չի համապատասխանում։ Խնդիրը զուտ երկրպագուների հարմարավետության մեջ էր․ նրանց համար դժվար էր վանկարկել նրա անունը։
Երբ նա խաղում էր Սուխումիում, տրիբունաները դժվարանում էին գոռալ՝ «Մկրտիչ, Մկրտիչ»։ Սկզբում նրան անվանում էին Միկիշկա, որն աստիճանաբար վերածվեց Նիկիտայի։
Երբ հայրս պետք է անձնագիր ստանար, դիմեց պապիկիս․ «Կարո՞ղ եմ գրանցվել որպես Նիկիտա»։ Նա արդեն սովորել էր, որ ընկերներն ու երկրպագուներն իրեն այդպես են դիմում։ Պապս տվել էր իր համաձայնությունը, բայց մեկ պայմանով․ «Այո՛, կարող ես, բայց անձնագրում հայրանունդ պետք է մնա Պողոսովիչ»։ Եվ իրոք, մինչև վերջերս հայրիկի բոլոր փաստաթղթերում հայրանունը նշված էր որպես Պողոսովիչ»։
- Եվ նա, այնուամենայնիվ, պաշտոնապես փոխե՞ց այն։
«Այո։ Նրան ողջ կյանքում դիմել են Նիկիտա Պալիչ, երբեմն՝ պարզապես Պալիչ։ Ոչ ոք նրան Պողոսովիչ չէր անվանում։ Եվ նա սկսեց մտորել․ «Ինչպե՞ս կստացվի․ ես կմահանամ, և շիրմաքարիս գրված կլինի «Նիկիտա Պողոսովիչ», մինչդեռ ինձ ողջ կյանքում ճանաչել են որպես Պալիչ»։
Նա որոշեց, որ իր հայրը չի նեղանա այդ քայլից, և պաշտոնապես փոխեց հայրանունը։ Դա տեղի ունեցավ մոտավորապես երկու տարի առաջ», — նշել է Վիկտորիան։
Հիշեցնենք, որ Նիկիտա Սիմոնյանը կյանքից հեռացել է 2025 թվականի նոյեմբերի 23-ին՝ 99 տարեկան հասակում։
