Հայաստանի պետական պարտքը աճել է 10.7%-ով հասնելով 13.66 միլիարդ դոլարի, իսկ պետական պարտատոմսերի տոկոսադրույքը կազմել է 10.5%
ՔԱՂԱՔԱԿԱՆՈՒԹՅՈՒՆ
ՀՀ կառավարության պարտքը 2025 թվականի սկզբից մինչև հոկտեմբերի վերջը աճել է 10.7%-ով հասնելով 13.661 միլիարդ դոլարի, գրում է tsargrad.tv–ն։ Պետական պարտքի կառավարման առումով Ֆինանսների նախարարությունը պահպանել է վերջին տարիների քաղաքականությունը. արտաքին վարկերը հետևողականորեն փոխարինվում են ներքին վարկերով՝ պետական պարտատոմսերի տեսքով։ Այս միտումը շարունակվել է նաև 2025 թվականին։ 2024 թվականի դեկտեմբերի համեմատ ներքին պարտքի բաժինը 51.8%-ից աճել է մինչև 53.5%–ի, մինչդեռ արտաքին պարտքի բաժինը նվազել է 48.2%-ից մինչև 46.5%–ի։ Մասնավորապես, արտաքին վարկերի բաժինը նվազել է 36.5%-ից մինչև 32.2%–ի։
Ֆինանսների նախարարությունը ներքին պարտքը անվանում է նախընտրելի գործիք։ Ազգային արժույթով պետական պարտատոմսերի եկամտաբերությունը զգալիորեն բարձր է՝ տարեկան մոտ 10.5%, մինչդեռ արտաքին վարկերի տոկոսադրույքը կազմում է մոտ 3-3.5%: Ներքին պարտքի վճարումները մնում են երկրի տնտեսությունում, այդ պարտատոմսերի զգալի ծավալներ գնվում են տեղական բանկերի կողմից, որոնք վերաներդնում են ստացված եկամուտները տնտեսությանը վարկեր տրամադրելով։
Միևնույն ժամանակ, կառավարությունը շարունակում է ներգրավել արտաքին վարկեր ինչպես կոնկրետ նախագծերի, այնպես էլ ընդհանուր բյուջեի համալրման համար (որոնք կապված չեն կոնկրետ ծախսերի հետ): Վերջերս կառավարությունը հաստատել է Արժույթի միջազգային հիմնադրամից մոտ 175 միլիոն դոլարի նոր բյուջետային վարկ, որը չի արտացոլվում տրամադրված վիճակագրության մեջ։ Այդ միջոցների զգալի մասը կօգտագործվի բնակչության առողջապահական ապահովագրության համակարգի սուբսիդավորման, ինչպես նաև Ղարաբաղից բռնի տեղահանված բնակիչների բնակարանային աջակցության համար: Եվրոբոնդերի (արտարժույթով պետական պարտատոմսեր) ծավալը աճել է 28%-ով, մարտին Ֆինանսների նախարարությունը թողարկել է նման պարտատոմսերի նոր խմբաքանակ և միաժամանակ մարել է նախորդ թողարկման մի մասը։
Նյութը հրապարակման պատրաստեց Կամո Խաչիկյանը
www.1or.am
