1 միլիոն դրամ բանկից հափշտակած, ապա փախուստի դիմած անձը կալանավորվել է

Նոյեմբերի 17-ին արտառոց դեպք էր տեղի ունեցել։ Զինված անձը ներխուժել էր Շինարարների 25 հասցեում գործող «ՎՏԲ» բանկի մասնաճյուղ և հափշտակել էր մեծ չափով գումար։  

Զինված անձը մտել էր բանկի մասնաճյուղ, իսկ պարանոցին գցած էր եղել ցուցանակ, որի վրա գրված է եղել. «Եթե փողերը չտաք, 20 վայրկյանում կտրաքացնեմ»։ 

Պարզվել էր, որ հափշտակությունը կատարել է Երևան քաղաքի Բաշինջաղյան փողոցի բնակիչ 32-ամյա Հովհաննես Բ.-ն, ով Գ. Շամշյանի տեղեկություններով՝ նախկինում եղել է մի քանի անգամ դատապարտաված, այդ թվում՝ գողության համար և արդեն նա Բագրատաշենի անցակետով լքել է Հայաստանը:

MediaHub-ը հետաքրքրվեց Քննչական կոմիտեից, թե արդյո՞ք անձը հայտնաբերվել է, և ի՞նչ նորություններ կան այդ մասով։  «Բանկից խոշոր չափերով ավազակություն կատարած անձի նկատմամբ որպես խափանման միջոց կիրառվել է կալանքը»,- նշեց Քննչական կոմիտեի մամուլի քարտուղար Կիմա Ավդալյանը։ 

MediaHub-ի տեղեկություններով՝ հափշտակված գումարն անցնում է 1 միլիոն դրամը: 

Մարիաննա Արամյան