Փաշինյանական իշխանություններին օդուջրի պես շոուներ են հարկավոր

Գաղտնիք չէ, որ Հայաստանի գործող իշխանությունները՝ Նիկոլ Փաշինյանի գլխավորությամբ, իրենց իշխանությունը երկարաձգելու համար դիմում են տարատեսակ շոուների, աղմկահարույց հայտարարություններով շեղելով հանրային ուշադրությունն օրախնդիր հարցերից, ձերբակալություններով ու բռնաճնշումներով, «նախկինների» դեմ քրեական վարույթներով խցանելով հանրային օրակարգերը։ Խորհրդարանը երեկ լսումներ էր կազմակերպել Մարտի 1-ի գործի վերաբերյալ, որոնք, ինչպես և սպասվում էին, իշխանության ներկայացուցիչների, արբանյակ կուսակցությունների և վաղուց գրպանային դարձած «քաղհասարակության» շնորհիվ դարձան նոր շոու-ներկայացում։

Ընդհուպ, իշխանության բազմաթիվ քարոզիչների թույլատրել էին բավական խիստ քննադատություն հնչեցնել գործող իշխանությունների հասցեին՝ իբր մարտի 1-ը բավարար չափով չքննելու համար։ «Հանուն Հանրապետության» կուսակցության նախագահ Արման Բաբաջանյանն, օրինակ, նշել է, թե այսօր արձանագրում ենք մեր երկրի իրավական, դատական համակարգերի վախճանը, որովհետև ՄԻԵԴ-ի՝ սեպտեմբերի 18-ի վճիռն ուղղակի արձանագրում է 17 տարվա համատարած անգործություն: «Եվ ես կարծում եմ՝ մենք ունենք շանս՝ սեպտեմբերի 18-ի վճիռը դարձնելու փոսից այդ համակարգը դուրս բերելու հնարավորություն: 17 տարի մենք բոլորս՝ որպես համակարգ, խուսափել ենք պարզ ճշմարտությունից՝ ասելու, որ Հայաստանը գնդակահարել է Հայաստանի քաղաքացիների»,- ասել է նա՝ հավելելով, թե 2008-ի իշխող վերնախավն ամբողջությամբ պատասխանատու է պետական մեքենայի կատարած սպանությունների, խոշտանգումների, ապօրինի կալանավորումների և դրանց բողոքարկման համար:

Նույն տրամաբանության մեջ են եղել նաև այլ անձանց ելույթները։ Գլխավոր դատախազ Աննա Վարդապետյանն էլ հայտարարել է, թե ՀՀ դատախազությունը դիմելու է Ռուսաստան՝ Մարտի 1-ի գործով նախկին գլխավոր դատախազ Գևորգ Կոստանյանի և նույն գործով քննչական խմբի նախկին ղեկավար Վահագն Հարությունյանի հանձնման միջնորդությամբ: «Չունենք ռուսական կողմից համաձայնություն՝ նրանց արտահանձնելու համար, թեև դատախազությունը կրկին հանձնման միջնորդություն է ուղարկելու Ռուսաստանի Դաշնություն՝ խնդրելով նորից դիտարկել նախկինում մերժված հանձնումը», - ասել է նա:

Վարդապետյանը հայտնել է, որ և՛ Կոստանյանը, և՛ Հարությունյանը Ռուսաստանում են գտնվում: Նման միջնորդությունն այս փուլում առնվազն տարօրինակ է, քանի որ նույն դատախազությունը տակավին օրեր առաջ մերժել էր ռուսական կողմի միջնորդությունը՝ հայտնի Ռուբեն Թաթուլանին (Ռոբսոնին) ՌԴ հանձնելու միջնորդությունը՝ նշելով, թե նա ՀՀ քաղաքացի է։ Գևորգ Կոստանյանը, հիշեցնենք, վաղուց ՌԴ քաղաքացի է դարձել։ 7 տարի լինելով իշխանության ղեկին՝ փաշինյանական իշխանությունը ոչինչ չի արել Մարտի 1-ը բացահայտելու ուղղությամբ, ավելին, Փաշինյանի ձևավորած ՍԴ-ն Ռոբերտ Քոչարյանի օգտին որոշում է կայացրել։ Եվ այսօր կրկին հարցը շահարկելը վկայում է, որ իշխանությունը ոչ թե գործը իրապես բացահայտելու, այլ աղմկահարույց դեպքերը շահարկելով, հանրությանը նոր «սնունդ» մատակարարելու խնդիր է լուծում։ 

Ելենա Բադալյան