Բաքվում մեծ մասշտաբով նշվել է Ղարաբաղյան պատերազմում Ադրբեջանի հաղթանակի տարեդարձը

Նոյեմբերի 8-ին Բաքվում մեծ մասշտաբով նշվել է Ադրբեջանի լիակատար հաղթանակի երկրորդ տարեդարձը 2020-2023 թվականների Ղարաբաղյան պատերազմում։ Այս հակամարտությունը, որը հայտնի է նաև որպես «Երկրորդ Ղարաբաղյան պատերազմ», ավարտվեց Լեռնային Ղարաբաղի Հանրապետության լուծարմամբ, որը 30 տարի գոյություն ուներ Հայաստանի իրավասության ներքո, գրում է bbc.com–ը։

Ադրբեջանի նախագահ Իլհամ Ալիևը և նրա հյուրերը՝ Թուրքիայի նախագահ Ռեջեփ Թայիփ Էրդողանը և Պակիստանի վարչապետ Շահբազ Շարիֆը, մասնակցել են Բաքվի գլխավոր հրապարակում անցկացված ռազմական շքերթին։ Հրապարակով անցել են ադրբեջանական բանակի բոլոր ստորաբաժանումների շարասյուները, ցուցադրվել են ժամանակակից տանկեր, զրահատեխնիկա, հեռահար հրթիռային համակարգեր և հրետանի։

Շքերթին մասնակցել են նաև Պակիստանի զինված ուժերի ստորաբաժանումները և Թուրքիայի նախագահական գվարդիայի արարողակարգային գնդի գումարտակը։ Շքերթի ավարտին քաղաքի վրայով թռել են ադրբեջանական անօդաչու թռչող սարքեր և թուրքական ռազմաօդային ուժերի F-16 կործանիչներ։

Ադրբեջանական լրատվամիջոցները հաղորդել են, որ հրապարակում հավաքվել են հազարավոր հանդիսատեսներ։ Շատերը վանկարկել են. «Ղարաբաղը Ադրբեջան է» և «Նահատակները երբեք չեն մահանում, հայրենիքը անբաժանելի է»։

«Իմ սիրելի եղբայր Էրդողանը աջակցել է Ադրբեջանին Երկրորդ Ղարաբաղյան պատերազմի առաջին ժամերից։ Նրա «Ադրբեջանը միայնակ չէ» խոսքերը դարձան ուղերձ ամբողջ աշխարհին։ Ադրբեջանական ժողովուրդը երբեք չի մոռանա այդ աջակցությունը», - իր ելույթում հայտարարել է Ալիևը։

Նա նաև ասել է, որ Ադրբեջանը հաղթանակ է տարել, քանի որ «երկիրը երեք տասնամյակ աշխատել է իր հողերը վերադարձնելու, ուժեղ տնտեսություն, անկախ արտաքին քաղաքականություն և ժամանակակից բանակ կառուցելու համար»։

Նյութը հրապարակման պատրաստեց Կամո Խաչիկյանը

www.1or.am