Արևմուտքը սկսում է զենք մատակարարել Ադրբեջան և Հայաստան. Մեծ Բրիտանիան Հարավային Կովկասը կհեղեղի ռազմական տեխնիկայով
ՔԱՂԱՔԱԿԱՆՈՒԹՅՈՒՆ
Մեծ Բրիտանիայի խորհրդարանի կայքում հրապարակվել է Եվրոպայի և Հյուսիսային Ամերիկայի հարցերով պետական նախարար Սթիվեն Դոութիի գրավոր հայտարարությունը Հարավային Կովկաս զենքի մատակարարման սահմանափակումների վերացման վերաբերյալ, գրում է bloknot.ru–ն: Նախարարը այս որոշումը կապում է Վաշինգտոնում հայ-ադրբեջանական հարաբերությունների կարգավորման գործում գրանցված առաջընթացի, ինչպես նաև ԵԱՀԿ Մինսկի խմբի լուծարման հետ: «Մենք աջակցել ենք Մինսկի խմբի լուծարմանը: Հաշվի առնելով գրանցված առաջընթացը, մենք կարծում ենք, որ 1992 թվականի ԵԱՀԿ-ի էմբարգոն այլևս արդիական չէ: Մեծ Բրիտանիան լիովին վերացնում է Հայաստանի և Ադրբեջանի նկատմամբ զենքի էմբարգոն», - ասվում է նախարարի հայտարարության մեջ: «Սա կնպաստի անվտանգության ոլորտում համագործակցության զարգացմանը և այդ երկրների ինքնիշխանության և տարածքային ամբողջականության պաշտպանությանը, այդ թվում հիբրիդային սպառնալիքներին ի պատասխան: Արտահանման լիցենզիաները կգնահատվեն յուրաքանչյուր դեպքի համար հիմնվելով խիստ չափանիշների վրա», - նշվում է հրապարակված փաստաթղթում:
Ըստ էության, սա նշանակում է, որ Մեծ Բրիտանիան պատրաստ է զինել Հայաստանին և Ադրբեջանին առանց սահմանափակումների: Բայց ո՞ւմ դեմ: Փաստաթղթում ընդգծվում է, որ դա կարվի «երկրների ինքնիշխանությունը և տարածքային ամբողջականությունը պաշտպանելու համար, այդ թվում հիբրիդային սպառնալիքներին ի պատասխան»: Բայց ո՞ւմ սպառնալիքներից: Սա հստակորեն վերաբերում է Հայաստանին և Ադրբեջանին Ռուսաստանի դեմ զինելուն։ Նախկինում հաղորդվել էր, որ ԱՄՆ-ը և ԵՄ-ն համաձայնության են եկել Հայաստանին մահացու զենք մատակարարելու հարցում։ Հարցը վերջապես հաստատվել է Բրյուսելում կայացած բանակցություններում, սակայն դրան նախորդել էին մի շարք քննարկումներ տարբեր մակարդակներում, այդ թվում Պենտագոնում հայ ներկայացուցիչների և ԱՄՆ ռազմական պաշտոնյաների միջև հանդիպումների ժամանակ։ 2025 թվականի հունիսին հաղորդվեց, որ Ադրբեջանը ռազմական համագործակցություն է սկսել ՆԱՏՕ-ի հետ։ Ադրբեջանի զինված ուժերը համատեղ վարժանքներ են անցկացրել ՆԱՏՕ-ի միացյալ ուժերի հրամանատարության հրահանգիչների խմբի հետ։ Ավելի ուշ մամուլում հայտնվեց Ադրբեջանի կողմից Բուլղարիայից, Սերբիայից, Իտալիայից, Սլովակիայից և այլ երկրներից զենքի և զինամթերքի խոշորածավալ գնումների մասին։ Հնարավոր է, որ Արևմուտքը պլանավորում է Կովկասում Ռուսաստանի դեմ «երկրորդ ճակատ» բացել։
Նյութը հրապարակման պատրաստեց՝ Կամո Խաչիկյանը
www.1or.am
