«ՎԱԶ 2112» մակնիշի ավտոմեքենան հայտնվել է ձորում. կա վիրավոր
ՀԱՍԱՐԱԿՈՒԹՅՈՒՆ
Երեկ՝ հոկտեմբերի 14-ին, ավտովթար է տեղի ունեցել Լոռու մարզում: Ժամը 16:30-ի սահմաններում Լոռու մարզի բնակիչ 23-ամյա Հենրիկ Գ.-ն իր վարած «ՎԱԶ 2112» մակնիշի ավտոմեքենայով, դեռևս անհայտ հանգամանքներում, Վանաձոր-Երևան ավտոճանապարհի Սպիտակի ոլորաններում դուրս է եկել երթևեկելի գոտուց, մի քանի պտույտ գլորվելով գլխիվայր հայտնվել ձորում:
Ինչպես հայտնում է ֆոտոլրագրող Գագիկ Շամշյանը, վթարի հետևանքով Հենրիկ Գ.-ն մարմնական վնասվածքներով տեղափոխվել է «Սպիտակ» բժշկական կենտրոն:
Դեպքի վայր են ժամանել ՀՀ ներքին գործերի նախարարության ոստիկանության պարեկային ծառայության Լոռու մարզի գումարտակի 2-րդ վաշտի 1-ին դասակի պարեկները՝ վաշտի հրամանատարի տեղակալ Հրաչ Մխիթարյանի, դասակի հրամանատարի տեղակալ Էդգար Պողոսյանի գլխավորությամբ:
Տարածքը սահմանազատել են նույն վաշտի պարեկներ Հովհաննես Հովհաննիսյանն ու Գևորգ Աբրահամյանը:
Վթարի մասին ՊԾ Լոռու մարզի գումարտակից տեղեկությունը փոխանցել են ՀՀ քննչական կոմիտեի Լոռու մարզային քննչական վարչության Սպիտակի քննչական բաժին, որտեղից ժամանել է քննչական խումբը՝ հերթապահ քննիչի գլխավորությամբ:
Վթարի փաստով Սպիտակի քննչական բաժնում նախաձեռնվել է քրեական վարույթ:
