«Թուրքիան չի բացի իր սահմանները Հայաստանի հետ նույնիսկ խաղաղության համաձայնագրի ստորագրումից հետո»

Դիվանագիտական հարաբերությունների բացակայությունը և Հայաստանի հետ Թուրքիայի փակ սահմանները նշանակում են, որ Երևանի և Անկարայի միջև բանակցային գործընթացը դեռևս չի հասել իր վերջնական նպատակին։ Նման կարծիք է հայտնել ՀՀ ԳԱԱ ակադեմիկոս, թուրքագետ Ռուբեն Սաֆրաստյանը, գրում է checheninfo.ru-ն։ «Պատճառն այն է, որ Անկարան, ըստ էության, նախապայման է դրել՝ այն է Հայաստանի և Ադրբեջանի միջև խաղաղության համաձայնագրի ստորագրումը։ Այդ մասին Անկարայից հայտարարություններ են անում ամենաբարձր մակարդակներով՝ սկսած Էրդողանից։ Մյուս կողմից, հատուկ ներկայացուցիչներ Ռուբինյանի և Քըլըչի միջև պարբերական հանդիպումները հանգեցրել են թուրքական հռետորաբանության որոշակի փոփոխությունների, այն որոշ առումներով անգամ մեղմացել է», - ասել է նա։

Նշելով տարբեր տեխնիկական հարցերի շուրջ շարունակվող քննարկումները՝ ակադեմիկոսը ընդգծել է, որ երրորդ երկրների քաղաքացիների և դիվանագիտական անձնագրեր ունեցողների համար սահմանը բացելու վերաբերյալ արդեն իսկ ձեռք բերված պայմանավորվածությունները չեն իրականացվում։ Պատճառը անհայտ է, բայց ակնհայտ է, որ կատարվող ամեն ինչ մեծապես որոշվում է Անկարայի մոտեցմամբ։

Ընդհանուր առմամբ, Սաֆրաստյանը կարծում է, որ Թուրքիան չի բացի իր սահմանները կամ չի հաստատի դիվանագիտական հարաբերություններ Հայաստանի հետ, նույնիսկ Երևանի և Բաքվի միջև խաղաղության համաձայնագրի ստորագրումից հետո։ Նա կանխատեսել է, որ թուրքերը կփորձեն սահմանափակել սահմանի բացումը միայն երրորդ երկրների քաղաքացիների համար։ Անկարան չի համաձայնի հարաբերությունների վերջնական կարգավորմանը։ «Թուրքիան և Ադրբեջանը ակնկալում են, որ TRIPP նախագծի իրականացումը կհաստատի ուղիղ ցամաքային կապեր նրանց միջև։ Այդ պայմաններում չեմ կարծում, որ Հայաստանից որևէ մեկը կմեկնի Ադրբեջանի միջով, օրինակ՝ Ռուսաստան։ Մեզ համար դա անվտանգ չէր նույնիսկ խորհրդային տարիներին։ Ես դա շատ լավ եմ հիշում։ Հնարավոր է, որ ապագայում դա հնարավոր դառնա, բայց ոչ հիմա», - եզրափակել է գիտնականը։

Նյութը հրապարակման պատրաստեց՝ Կամո Խաչիկյանը
www.1or.am