Մոնղոլիան և Հայաստանը պատրաստում են իրավական հիմք առանց վիզայի ռեժիմի համար

Մոնղոլիան և Հայաստանի Հանրապետությունը ստեղծում են հարթակ իրենց քաղաքացիների միջև առանց վիզայի ճանապարհորդության համար, գրում է burunen.ru–ն: Այդ նպատակին հասնելու համար ստորագրվել է արձանագրություն, որը փոփոխություններ է մտցնում «Մոնղոլիայի կառավարության և Հայաստանի Հանրապետության կառավարության միջև դիվանագիտական, ծառայողական և քաղաքացիական անձնագրերի տերերի համար վիզայի ազատման մասին» համաձայնագրում:

Այս արձանագրության շնորհիվ երկու երկրների քաղաքացիներն այժմ կարող են առանց վիզայի ճանապարհորդել, ինչը, ըստ Մոնղոլիայի արտաքին գործերի նախարարության, կարևոր քայլ է զբոսաշրջության, մշակութային կապերի, կրթական փոխանակումների և փորձի փոխանակման, ինչպես նաև տնտեսական համագործակցության զարգացման ուղղությամբ:

Մոնղոլիայի և Հայաստանի արտաքին գործերի նախարարները ստորագրել են արձանագրություն: Ստորագրումը տեղի է ունեցել ՄԱԿ-ի Գլխավոր ասամբլեայի 80-րդ նստաշրջանի ընդհանուր քննարկման ժամանակ: Բարեկամ երկրների արտաքին գործերի նախարարներ Բատցեցեգ Բատմունխը և Արարատ Միրզոյանը գոհունակությամբ նշել են, որ Մոնղոլիայի և Հայաստանի Հանրապետության միջև ավանդական բարեկամական հարաբերություններն ու համագործակցությունը համատեղ ջանքերի արդյունքում ակտիվորեն զարգանում են փոխադարձ հետաքրքրություն ներկայացնող ոլորտներում: Նրանք համաձայնել են ավելի խորացնել համագործակցությունը հատուկ ուշադրություն դարձնելով առևտրաշրջանառության ավելացմանը: Կողմերը նաև մտքեր են փոխանակել ՄԱԿ-ի և այլ միջազգային կազմակերպությունների շրջանակներում ակտիվ համագործակցության վերաբերյալ:

Մոնղոլիայի և Հայաստանի Հանրապետության միջև դիվանագիտական հարաբերությունները հաստատվել են 1992 թվականի փետրվարի 21-ին:

Նյութը հրապարակման պատրաստեց՝ Կամո Խաչիկյանը

www.1or.am