Թուրքիան ողջունում է Արարատ լեռան հեռացումը Հայաստանի սահմանային դրոշմանիշներից
ՔԱՂԱՔԱԿԱՆՈՒԹՅՈՒՆ
ՀՀ կառավարությունը որոշել է նոյեմբերի 1-ից հեռացնել Արարատ լեռան պատկերը սահմանային մուտքի և ելքի կետերում դրվող դրոշմակնիքներից, գրում է rtvi.com-ն։ Թուրքական մամուլը, մեջբերելով ՀՀ վարչապետ Նիկոլ Փաշինյանի այն հայտարարությունը, որ «Արարատը Հայաստան չէ», այդ որոշումը դիտարկում է որպես Երևանի նոր, պրագմատիկ կուրսի ցուցադրում, որպես խորհրդանշական և դիվանագիտական ազդանշան։ Daily Sabah թերթը հայտնել է, որ Արարատ լեռան պատկերի հեռացումը «դիտարկվում է որպես բարի կամքի դրսևորում Թուրքիայի հետ հարաբերությունները կարգավորելու ջանքերի շրջանակներում»։
Haber7 պորտալը շեշտել է, որ Արարատ լեռան հեռացումը պաշտոնական փաստաթղթերից «պատմական փոփոխություն» է, քանի որ Երևանն այդ խորհրդանիշն օգտագործել է երկար տարիներ։ Թուրքական հրատարակությունը նաև նշել է հայկական կողմի չափավոր մոտեցումը, որը «հնարավորություն է տալիս նոր էջ բացել երկու հարևան երկրների միջև հարաբերություններում»։ Turkish Minute-ը նշել է, որ որոշումը կայացվել է հարևաններին «վտանգավոր ազդանշաններ» չուղարկելու համար։
Սակայն որոշները պնդում են, որ Հայաստանի կառավարությունը գործում է «ճնշման տակ»՝ Անկարային հանգստացնելու համար։ Իշխանությունը այս քայլը վերագրում է պրագմատիզմին և Թուրքիայի հետ ավելի սերտ համագործակցության ցանկությանը։ Վարչապետ Նիկոլ Փաշինյանը նախկինում ընդգծել էր, որ այդ լեռը չի գտնվում հայկական տարածքում, և Արարատը պատկերող ներկայիս զինանշանը չի արտացոլում 1991 թվականին հիմնադրված պետությունը և պահանջում է վերանայում։
Մասնագետներն ու թուրքական լրատվամիջոցները խորհրդանիշի հեռացումը համարում են դրական ազդանշան Թուրքիայի և Հայաստանի միջև հարաբերությունների կարգավորման և սահմանների հնարավոր բացման համար, ինչպես նաև քայլ՝ տարածաշրջանում տնտեսական և մշակութային համագործակցության ընդլայնման ուղղությամբ։
Նյութը հրապարակման պատրաստեց Կամո Խաչիկյանը
