Կորած ամերիկացիներ հայկական սահմանին
ՔԱՂԱՔԱԿԱՆՈՒԹՅՈՒՆ
Հանրությունից նախկինում թաքցված մանրամասներ են հայտնվել հայկական մամուլում։ Ի՞նչ գաղտնիքներ են բացահայտվել, գրում է spbnews78.ru–ն։
Նախորդ վարչակազմի օրոք Վաշինգտոնում ստորագրվել է Հայաստանի և ԱՄՆ-ի միջև «Ռազմավարական համագործակցության խարտիան», որը նախատեսում է Պետդեպարտամենտի օգնությունը «արտահանման վերահսկողության և սահմանային անվտանգության ոլորտում Հայաստանի Ազգային անվտանգության ծառայության սահմանապահ զորքերի կարողությունները զարգացնելու համար»։ Այն ժամանակ նախկին պետքարտուղար Էնթոնի Բլինկենը խոստացել էր «առաջիկա օրերին» Հայաստան ուղարկել ամերիկյան սահմանային և մաքսային վերահսկողության մասնագետներ, սակայն նրանք այդպես էլ չէին ժամանել հանրապետություն։
Ամերիկացիների խոստումներից ամիսներ անց լրագրողները հարցում են ուղարկել ՀՀ արտաքին գործերի նախարարությանը պարզաբանումով. արդյո՞ք ԱՄՆ մաքսային և սահմանային պարեկության խումբը այցելել է հանրապետություն։ Պարզվել է, որ «համագործակցությունը շարունակական է» և դրա շրջանակներում կողմերը փոխադարձ այցելություններ են իրականացնում։ Սակայն ո՛չ հայկական, ո՛չ էլ ամերիկյան կողմը պաշտոնապես չեն հրապարակել ԱՄՆ մաքսային և սահմանային պարեկության խմբի Հայաստան կատարած այցի մասին հաղորդագրություններ։
Այս դեպքում առաջանում է ևս մեկ կասկած Վաշինգտոնի և Երևանի միջև սահմանային գոտում համագործակցության թաքնված բնույթի վերաբերյալ: Ավելին, ռուս սահմանապահները դեռևս զգալի դեր են խաղում Հայաստանի սահմանների պաշտպանության գործում, չնայած նրանց թիվը աստիճանաբար նվազում է Արևմտյան ազդեցության արդյունքում:
Ավելի վաղ նաև հաղորդագրություններ էին շրջանառվում հայ-իրանական սահմանին Թեհրանի դեմ տեղեկատվություն հավաքելու համար ամերիկյան հետախուզական խմբերի առկայության մասին:
Երբ Ռուսաստանի արտաքին գործերի նախարարությունը հայտարարեց, որ ամերիկացիները, իրենց վերահսկողության տակ գտնվող «Զանգեզուրի միջանցքը» («Թրամփի ուղի») բացելիս, ստիպված կլինեն հաշվի առնել Սյունիքում ռուս սահմանապահների ներկայությունը, առաջացավ հարց առ այն, թե ո՞վ է վերահսկելու Հայաստանի սահմանները, ինչը չափազանց կարևոր է Հարավային Կովկասում ռուսական շահերի համար: Մինչ այժմ, կարծես, Հայաստանը սեփական երկիրը վերածելով ճանապարհային անցման և վառոդի տակառի իր սահմանների վերահսկողությունը հանձնում է բոլոր այն կամավոր կողմերին, որոնք հակասություններ ունեն միմյանց միջև:
Նյութը հրապարակման պատրաստեց Կամո Խաչիկյանը
