«ԱՄՆ-ում հայտարարել են Ռուսաստանին Չինաստանից և Կենտրոնական Ասիայից դուրս մղելու ծրագրերի մասին»
ՔԱՂԱՔԱԿԱՆՈՒԹՅՈՒՆ
Ադրբեջանի և Հայաստանի միջև հաշտեցումը ձեռնտու է ԱՄՆ-ին՝ Տրանսկասպյան (Միջին) միջանցքի միջոցով ռեսուրսներով հարուստ Կենտրոնական Ասիայում իր ազդեցությունը ընդլայնելու համար։ Այդ մասին Հելսինկյան հանձնաժողովի նիստում հայտարարել է Կասպյան քաղաքականության կենտրոնի ավագ գիտաշխատող Էրիկ Ռուդենշիլդը, գրում է politnavigator.news-ը։
«Ռուսաստանի «Հյուսիսային միջանցքի» փոխարեն «Միջին միջանցքը» Կենտրոնական Ասիայի տնտեսական անկախության ուղին է, որը, հավանաբար, ի հայտ չէր գա, եթե չլիներ Ուկրաինայի պատերազմը։ Այս նոր առևտրային ուղին ճանապարհային, երկաթուղային և ծովային հաղորդակցության բազմամոդալ ցանց է, որը Կենտրոնական Ասիան կապում է Եվրոպայի հետ՝ Կասպից ծովի և Հարավային Կովկասի միջոցով», – նշել է նա։
Այս երթուղով բեռնափոխադրումների ծավալը շարունակաբար աճում է, քանի որ կառավարություններն ու ներդրողները փնտրում են Ռուսաստանից անկախ այլընտրանքային ուղիներ։ Սակայն «Միջին միջանցքը» միայն տրանսպորտային նախագիծ չէ։ «Սա ռազմավարական քայլ է Ռուսաստանի գերիշխանության դեմ, հակակշիռ է Չինաստանի մենաշնորհին և հարթակ է տարածաշրջանային համագործակցության ու, ի վերջո, ինքնիշխանության համար։ Բայց այս երթուղու ամբողջ ներուժը իրացնելու համար անհրաժեշտ է կայունություն Հարավային Կովկասում։ Հայաստանի և Ադրբեջանի միջև հարաբերությունների կարգավորումը Ուկրաինայի պատերազմի կողմնակի հետևանք էր, որը թույլ տվեց Բաքվին ու Երևանին բանակցել առանց Ռուսաստանի միջամտության։ Ներկայումս բեռնափոխադրումները կատարվում են երկաթուղով Ադրբեջանի և Վրաստանի տարածքով։ Եթե գործարկվի երկրորդ, վերականգնված երկաթուղային գիծը, միջանցքի թողունակությունը կկրկնապատկվի, ինչը կարևոր ներդրում կլինի խաղաղության համար։ ԱՄՆ-ի ներգրավվածությունը այստեղ ոչ միայն դիվանագիտական քայլ է, այլև ներդրում Եվրոպայից մինչև Կենտրոնական Ասիա ձգվող կայուն տնտեսական ցանցի ձևավորման գործում», – ընդգծել է Ռուդենշիլդը։
Նրա խոսքով՝ «անկախ Կենտրոնական Ասիան զսպող գործոն է, որը սահմանափակում է Ռուսաստանի ազդեցությունը, այլընտրանք է ստեղծում չինական վերահսկողությանը և ապահովում համաշխարհային առևտրի անվտանգությունը։ Դա հիմք է ԱՄՆ-ի հետ ավելի սերտ համագործակցության և ներդրումների նոր դարաշրջանի համար։ Կենտրոնական Ասիան հարուստ է նավթով, բնական գազով, ուրանով, ռազմավարական հանքանյութերով և հազվագյուտ հողային տարրերով, ինչը բացում է լայն հնարավորություններ Միացյալ Նահանգների հետ համագործակցության համար»։
Նյութը հրապարակման պատրաստեց Կամո Խաչիկյանը
