Անձնակազմի, սպառազինության եւ ռազմական տեխնիկայի համալրում. Պատերազմից ի՞նչ վերլուծություններ է արել ԶՈՒ-ն
ՔԱՂԱՔԱԿԱՆՈՒԹՅՈՒՆ
Քառօրյա պատերազմից ՀՀ Զինված ուժերի ղեկավարությունը, համագործակցելով ԼՂՀ Պաշտպանության նախարարության հետ, վերլուծություններ կատարել է, որի հիման վրա էլ կառուցում է ներկայիս գործունեությունը: Այս մասին այսօր` հուլիսի 3-ին, Գյումրիում լրագրողների հետ զրույցում ասել է ՀՀ պաշտպանության նախարար Սեյրան Օհանյանը` պատասխանելով հարցին, թե ինչու քայլեր չեն ձեռնարկվել` կանխելու ապրիլյան պատերազմը:
«Առաջինը, համալրում` անձնակազմ, սպառազինություն եւ ռազմական տեխնիկա, երկրորդ` պատրաստություն, որն ուղղված կլինի մեր մարտական կարողությունների ավելացմանը»,- ասել է նախարարը:
Սեյրան Օհանյանը հավաստիացրել է, որ մշտապես նման միջոցառումներ կատարվել են: Հարցին, թե ինչու մինչեւ այդ չէին կատարվում այդ քայլերը, նախարարը պատասխանել է. «Ճիշտ չէ այն հարցը, որ դուք տալիս եք, քանի որ յուրաքանչյուր իրականացում բերում է արդյունքներ եւ բացահայտում նոր թերություններ: Պետք է տեղեկացնեմ, որ մենք անցկացրել ենք պաշտպանական ռազմավարական վերանայում ԼՂՀ պաշտպանության բանակի հետ եւ եզրակացրել ենք, որ պաշտպանական այն բնագիծը, որն ինժեներական առումով ականապայթյունային եւ ոչ ականապայթյունային համապատասխան սարքավորումներով կահավորված է, համապատասխանում է այսօրվա պատերազմական գործողությունների բնույթին:
Լավ կողմից ներկայացված է եղել սպառազինության եւ ռազմական տեխնիկայի վիճակը, այլ բան է` տեսնելով իրականության մեջ հակառակորդի օգտագործած զենքը` պետք է շարունակենք զարգացնել մեր ունեցածը»:
