Նույնիսկ պայուսակներն ու գրենական պիտույքներն են վախեցնում իշխանություններին. «Փաստ»

«Փաստ» օրաթերթը գրում է.

Սամվել Կարապետյանին կալանավորելով, նույնիսկ Սամվել Կարապետյանի նկարով վահանակները պոկոտելով ու առգրավելով՝ օրվա իշխանություններն ապացուցում են իրենց՝ արդեն զավեշտի հասնող վախերը: Սակայն, մեր տեղեկություններով, այս դեֆորմացված վարքագիծը նոր աստիճանի է հասել:

Ինչպես տեղեկացրել ենք, օրերս «Տաշիր» բարեգործական հիմնադրամը հայտարարեց, որ սեպտեմբերի 1-ին ընդառաջ սկսել է Հայաստանի գյուղական համայնքների առաջին դասարանցիներին նվիրել դպրոցական պայուսակներ՝ անհրաժեշտ գրենական պիտույքներով։ Իհարկե, նման նախաձեռնություններով Սամվել Կարապետյանը հանդես է եկել տասնյակ տարիներ, և այս նախաձեռնությունը նորություն չէ: Սակայն ուշագրավ է, որ այս անգամ նույնիսկ Հայաստանի գյուղական համայնքների առաջին դասարանցիներին հասանելիք նվերներն են իշխանությունները որոշել «ձերբակալել» կամ «կալանավորել»:

Բացի այն, որ իշխանությունները կեղծ տեսանյութեր են տարածում, թե իբր պայուսակներից ու գրենական պիտույքներից 1-2 հրաժարվողներ կան, մեր աղբյուրների փոխանցմամբ, դպրոցների տնօրեններին հանձնարարվել է, որ առավելագույնս խոչընդոտեն, այնպես անեն, որ ծնողները չստանան այդ աջակցությունը: Տեղերում քպական ղեկավարները նույնիսկ այցելում են մարդկանց տներ և համոզում, վախեցնում: Կան նույնիսկ տեղեկություններ, որ գործին միացել է նաև ոստիկանությունը՝ խոչընդոտելով, որ նվերներ տեղափոխող ավտոմեքենաները մուտք գործեն համայնքներ:

Ակնհայտ է, որ Սամվել Կարապետյանի «Մեր ձևով» արտահայտությունն անասելի վախ է առաջացրել, սակայն հարցն այն է, թե ինչո՞ւ պետք է հազարավոր երեխաներ, հազարավոր ընտանիքներ զրկվեն աջակցությունից: Ստացվում է՝ իշխանությունը ոչ մի կերպ չի աջակցում Հայաստանի հատկապես գյուղական համայնքների բնակիչների հոգսերը նվազեցնելու հարցում, իսկ ով դա փորձում է անել, խոչընդոտում են:

Մանրամասները՝ «Փաստ» օրաթերթի այսօրվա համարում