Ինչպե՞ս է աշխարհը արձագանքել Հայաստան-Ադրբեջան համաձայնագրին
ՔԱՂԱՔԱԿԱՆՈՒԹՅՈՒՆ
Հայաստանի և Ադրբեջանի հարևանները, ինչպես նաև միջազգային հանրության մյուս անդամները մեծամասամբ ոգևորությամբ են արձագանքել Բաքվի և Երևանի միջև ուրբաթ օրը Վաշինգտոնի մասնակցությամբ ստորագրված նոր խաղաղության համաձայնագրին, գրում է euronews.com–ը։
Տասնամյակներ շարունակվող հակամարտությանը վերջ դնելու նպատակ ունեցող համաձայնագիրը ներառում է Հարավային Կովկասում միջանցք, որը Հայաստանի տարածքով կապում է Ադրբեջանը նրա էքսկլավի՝ Նախիջևանի հետ։ «Թրամփի ճանապարհ» անվամբ այդ միջանցքը պետք է հանձնվի Միացյալ Նահանգներին։
Իրանը կտրականապես դեմ էր դրան, խոստանալով փակել միջանցքը։ Իսլամական Հանրապետության արտաքին գործերի նախարարությունը մտահոգություններ է հայտնել իր սահմաններին օտարերկրյա ներկայության հնարավոր բացասական հետևանքների վերաբերյալ։
Վրաստանի վարչապետ Իրակլի Կոբախիձեն, ինչպես նաև վրացական ընդդիմությունը, ողջունել են համաձայնագիրը, այն անվանելով կայունության և տնտեսական նոր դարաշրջանի սկիզբ։
Ռուսաստանը, որը կորցրել է բանակցություններում միջնորդի իր կարգավիճակը, դրական է գնահատել դրանց արդյունքը։ Սակայն երկրի արտաքին գործերի նախարարությունը հստակեցրել է, որ տարածաշրջանի խնդիրները չեն կարող լուծվել առանց Մոսկվայի մասնակցության։
ԵՄ-ն և ՄԱԿ-ը ոգևորությամբ են ընդունել լուրը՝ նշելով համաձայնագրի առավելությունները երկարատև խաղաղության հասնելու համար։ ԵՄ արտաքին գործերի գերագույն ներկայացուցիչը սոցիալական ցանցերում հրապարակել է պաշտոնական հայտարարության հղումը, որը ուրվագծում է այդ պատմական համաձայնագրին հասնելու վերջին ուղին. «Անցյալ տարվա մարտին խաղաղության համաձայնագրի տեքստի շուրջ հայ-ադրբեջանական երկկողմ բանակցությունների ավարտը կարևոր և վճռական քայլ էր դեպի Հայաստանի և Ադրբեջանի միջև հարաբերությունների լիակատար կարգավորում՝ հիմնված միմյանց ինքնիշխանության, տարածքային ամբողջականության և սահմանների անձեռնմխելիության փոխադարձ ճանաչման վրա՝ համաձայն 1991 թվականի Ալմա-Աթայի հռչակագրի»։
Նյութը հրապարակման պատրաստեց Կամո Խաչիկյանը
