Ջենիֆեր Լոպեսի համերգն ու «ոսկե» տուրիստները. Գևորգ Պապոյանի հակասող թվերը. «Ժողովուրդ»
ՄԱՄՈՒԼԻ ՏԵՍՈՒԹՅՈՒՆ
«Ժողովուրդ» օրաթերթը գրում է. ««Ժողովուրդ» օրաթերթը պարզել է, որ էկոնոմիկայի նախարարի հայտարարած թվերը չեն համընկնում էկոնոմիկայի նախարարության պաշտոնական տվյալների հետ։
ՀՀ էկոնոմիկայի նախարար Գևորգ Պապոյանը վերջերս հայտարարեց, որ Ջենիֆեր Լոպեսի համերգի կապակցությամբ Հայաստան ժամանած զբոսաշրջիկները միջինում ծախսել են 888 դոլար։ Այս գնահատականը հանրային մեծ հետաքրքրություն ու քննարկում առաջացրեց։ «Ժողովուրդ» օրաթերթը ուսումնասիրել է նախարարության պաշտոնական տվյալներն ու պարզել՝ այդ թիվը, մեղմ ասած, խիստ չափազանցված է։
Ըստ Էկոնոմիկայի նախարարության պաշտոնական կայքում հրապարակված հետազոտության՝ միջին վճարունակությամբ զբոսաշրջիկը Հայաստանում մեկ օրվա ընթացքում ծախսում է ընդամենը 51 դոլար։ Եթե հաշվենք, որ Ջենիֆեր Լոպեսի համերգի համար ժամանած զբոսաշրջիկները մնացել են, օրինակ, 3 օր, ապա նրանց ընդհանուր ծախսը պետք է կազմի մոտ 150 դոլար, ինչը մի քանի անգամ պակաս է նախարարի նշած 888 դոլարից։
Ավելին, նախարարության տվյալներով՝ Ռուսաստանից, Վրաստանից և Իրանից ժամանած զբոսաշրջիկների օրական ծախսերը հատկապես ցածր են՝ ընդամենը 35-ից 47 դոլար։ Հաշվի առնելով, որ Հայաստանի զբոսաշրջային հիմնական հոսքը գալիս է հենց այս երկրներից, դժվար է պատկերացնել, որ համերգի ժամանակաշրջանում հանկարծակի հայտնվել են բացառապես բարձր վճարունակ զբոսաշրջիկներ, որոնք իրենց ծախսերով գերազանցել են նույնիսկ եվրոպացի տուրիստներին։
Այսպիսով՝ նախարար Պապոյանի հրապարակած տվյալները, ինչպես միշտ, չափազանցված են և խիստ մոտավոր:
Իսկ եթե իսկապես նման մեծ ծախսեր արձանագրվել են, ապա անհրաժեշտ է ներկայացնել համապատասխան հիմնավորումներ, ոչ թե միայն ճոխ թվեր հնչեցնել»։
Մանրամասները՝ թերթի այսօրվա համարում:
