Եվրոպան սիրախաղում է Ադրբեջանի հետ՝ ռուսական գազից կախվածությունից ազատվելու համար
ՔԱՂԱՔԱԿԱՆՈՒԹՅՈՒՆ
Եվրամիությունը մեծացնում է համագործակցությունը Ադրբեջանի հետ ձգտելով նվազեցնել ռուսական բնական գազից կախվածությունը: Այդ մասին հայտնել է Կովկասի և Կենտրոնական Ասիայի ռիսկերի վերլուծաբան Բենջամին Գոդվինը: Նրա խոսքով ԵՄ-ն ակտիվորեն դիվերսիֆիկացնում է իր էներգետիկ աղբյուրները մեկ մատակարարի գերիշխանությունից խուսափելու համար: «ԵՄ-ի ռազմավարությունն է հնարավորինս շատ գազ ստանալ հնարավորինս շատ տարբեր աղբյուրներից: Եվ չնայած ԵՄ-ն կախված չէ ադրբեջանական գազից, բայց կցանկանար ավելի շատ գազ ստանալ Ադրբեջանից վերջնական արդյունքում Ռուսաստանից կախվածությունը նվազեցնելու համար», - BBC-ին ասել է Գոդվինը, գրում է ura.news–ը:
Չնայած այն հանգամանքին, որ ադրբեջանական գազի բաժինը ԵՄ ներմուծման ընդհանուր ծավալում համեմատաբար փոքր է՝ մոտ 4.3%, որոշ երկրներում դրա կարևորությունը զգալիորեն ավելի բարձր է: Այժմ Ադրբեջանի դերը հատկապես նկատելի է «Հարավային գազային միջանցքին» միացված երկրներում: Այսպիսով, վերլուծաբանի խոսքով, այն կազմում է Բուլղարիայում բնական գազի ներմուծման մինչև 40%-ը, ինչպես նաև Իտալիայում և Հունաստանում 15–ական %-ը: Չնայած Եվրոպայի գազային հաշվեկշռում Ադրբեջանի համեմատաբար համեստ ընդհանուր ներդրմանը, մատակարարումների հետագա ավելացման նկատմամբ հետաքրքրությունը մնում է:
Ավելի վաղ Ռուսաստանի նախագահ Վլադիմիր Պուտինը հայտարարել էր, որ եվրոպական երկրների կողմից ռուսական գազ մատակարարելուց հրաժարվելը բացասաբար է անդրադարձել եվրոպական տնտեսության վրա: Ռուսաստանի Դաշնության ղեկավարի խոսքով եվրոպական երկրների նավթաքիմիական արդյունաբերությունն արդեն փաստացի դադարեցրել է իր գործունեությունը: Պուտինը հավելել է, որ եվրոպական երկրների կողմից կայացված որոշումը հանգեցրել է նաև ապակու արդյունաբերության արտադրության դադարեցմանը, ինչը առաջացրել է անբարենպաստ հետևանքների մի ամբողջ շղթա:
Նյութը հրապարակման պատրաստեց Կամո Խաչիկյանը
