Մբապեին կրկին մեղադրում են

Ֆրանսիայում վարչական քննություն է սկսվել Կիլիան Մբապեի նկատմամբ՝ կաշառակերության կասկածանքով։ Ըստ Le Canard Enchaîné-ի՝ ֆրանսիացի հարձակվողը 2023 թվականին իր անձնական հաշվից 180300 եվրո է փոխանցել Հանրապետական անվտանգության ծառայության (CRS) հինգ աշխատակցի, որոնք ապահովել են Ֆրանսիայի հավաքականի անվտանգությունը։ Չորս աշխատակցից յուրաքանչյուրը ստացել է 30000 եվրո, իսկ նրանց ղեկավարը՝ 60300 եվրո։

Մբապեն հայտարարել է, որ 2022 թվականի աշխարհի առաջնության իր բոնուսը նվիրաբերել է բարեգործական նպատակներով, այդ թվում՝ անվտանգության աշխատակիցներին։ Նա ընդգծել է, որ այդ գործողությունն իրականացրել է հարկային իրավաբանների հետ խորհրդակցելուց հետո։

Այնուամենայնիվ, Ներքին ոստիկանության տեսչությունը (IGPN) ուսումնասիրում է, թե արդյո՞ք այդ փոխանցումները խախտել են օրենքը կամ կարո՞ղ են դիտարկվել որպես անձնական ծառայությունների դիմաց փոխհատուցում։ Հատկապես ուշադրության կենտրոնում է CRS-ի հրամանատարը, որը Մբապեին ուղեկցել է նաև նրա անձնական ուղևորությունների ժամանակ:

Քննությունը շարունակվում է՝ պարզելու՝ արդյո՞ք խոսքը կամավոր նվիրատվությունների մասին է, թե՞ հնարավոր կաշառքի։ Մբապեի ներկայացուցիչները հայտնել են, որ ֆուտբոլիստը պատրաստ է համագործակցել իրավապահների հետ։