Կեղծարարության դեմ պայքար՞. Վրաստանն ավելի ու ավելի է դանդաղեցնում հայկական կոնյակի մատակարարումը Բելառուս
ՔԱՂԱՔԱԿԱՆՈՒԹՅՈՒՆ
Այս տարվա ապրիլի վերջից Վրաստանի մաքսային մարմինները կտրուկ ավելացրել են Հայաստանից Բելառուս և Ռուսաստան տեղափոխվող ալկոհոլային խմիչքների ստուգումների քանակը։ Արդյունքում, ինչպես նշել է STA Logistic ընկերությունը officelife.media-ի հետ զրույցում, Վրաստանի տարածքով կոնյակի տարանցման ժամանակը զգալիորեն ավելացել է։
Վրաստան մուտք գործելիս մաքսային մարմինները կոնյակով բեռնատարներն ուղարկում են Թբիլիսիում գտնվող կենտրոնական մաքսային կետ՝ խորը ստուգման։ Նմուշառման, ստուգման և համապատասխան մարմնի եզրակացության գործընթացը կարող է տևել առնվազն մեկ ամիս։ Ռուսական լրատվամիջոցները, մասնավորապես RBC-ն, գրել է Վրաստանում հայկական կոնյակով բեռնատարների տասնյակների կուտակման մասին, որոնց մուտքը Ռուսաստան արգելված է։ Որոշ բեռնատարներ արդեն մեկուկես ամիս է, ինչ կանգնած են։
STA Logistic-ի ներկայացուցչի խոսքով առաջին ամսվա ընթացքում նման ստուգումների ենթարկվել են միայն որոշ հայ արտադրողների արտադրանքը։ Սակայն վերջին երկու-երեք շաբաթների ընթացքում Հայաստանից թունդ ալկոհոլային խմիչքներով բեռնատարների մեծ մասն է կալանավորվել անկախ արտադրողից։
Վրացական կողմը ստուգումների ավելացումը բացատրում է նրանով, որ ցանկանում է կանխել հայտնի հայ արտադրողների ալկոհոլի անվան տակ կեղծ ապրանքների տեղափոխումը Վրաստանով։ Ոչ պաշտոնական տարբերակի համաձայն պատճառը կարող է լինել վրաց և հայ արտադրողների միջև ռուսական շուկայի համար առևտրային պատերազմը։
Ինչպես նշում է STA Logistic-ը, նման ուշացումներով հայկական ալկոհոլի մատակարարման տարանցիկ ժամանակը մեծանում է առնվազն չորս շաբաթով։ Բացի դա, ինչպես ցույց է տալիս պրակտիկան, ստուգումից հետո վրացական կողմը բեռնատարները վերադարձնում է Հայաստան։
Այս իրավիճակում, ինչպես նաև եթե հաշվի առնենք սեզոնային ապրանքների, օրինակ ծիրանի արտահանման սկիզբը, ապրանքների տեղափոխման սակագները երկու-երեք անգամ աճել են։ «Եվ դա վերջնական սահմանը չէ», - ընդգծել է ընկերությունը։
STA Logistic-ի ներկայացուցչի խոսքով բելառուսական փոխադրողների կողմից Վրաստանի հարկային ծառայությանը կամ ֆինանսների նախարարությանը դիմելը ոչնչի չի հանգեցնում։ Արժե կապ հաստատել մաքսային մարմնի հետ, որը պատվիրել է ստուգումների կազմակերպումը։ Մեծ հավանականություն կա, որ նա էլ նման տեղեկատվություն չի տրամադրի փոխադրողներին, բայց կկարողանա այն փոխանցել արտադրողին։
Նյութը հրապարակման պատրաստեց Կամո Խաչիկյանը
