Իրանի ԻՀՊԿ հրամանատարը uպառնում է ԱՄՆ-ին
ՄԻՋԱԶԳԱՅԻՆ
Իրանի ԻՀՊԿ հրամանատար, բրիգադի գեներալ Մոհամմադ Պակպուրը հայտարարել է, որ Իրանը ավելի ջախջախիչ պատասխան կտա ԱՄՆ-ին, եթե Վաշինգտոնը կրկին հարձակվի Իրանի վրա, հաղորդում է Mehr-ը։
«Մենք զգուշացնում ենք հիմար ամերիկացի նախագահին, որը թալանել է ամերիկյան ժողովրդի շահերն ու անվտանգությունը չար սիոնիստական ռեժիմի գոյատևման համար, որ եթե նա կրկնի իր ագրեսիան Իրանի դեմ, կստանա ավելի ջախջախիչ և ցավալի պատասխան, որը դաս կլինի պատմության համար», — ասել է Պակպուրը։
Իրանի զինված ուժերը երկուշաբթի երեկոյան հրթիռներ են արձակել Կատարում գտնվող ամերիկյան ռազմաբազայի վրա՝ ի պատասխան իրանական միջուկային օբյեկտների վրա ԱՄՆ-ի հարվածների։
Հրթիռները արձակվել են Կատարում գտնվող ԱՄՆ Ալ Ուդեյդ ավիաբազայի վրա՝ երկուշաբթի երեկոյան «Նվաճման նախանշան» գործողության շրջանակներում։
Իսլամական հեղափոխության պահապանների կորպուսը (ԻՀՊԿ) հայտարարության մեջ նշել է, որ հարվածը ուղղված է եղել ԱՄՆ կենտրոնական հրամանատարության շտաբ-բնակարանին, որը Միացյալ Նահանգների ամենամեծ ռազմավարական ակտիվն է Արևմտյան Ասիայում։
ԻՀՊԿ-ն հայտարարել է, որ Իրանի ուղերձը Սպիտակ տանը և նրա դաշնակիցներին հստակ էր. «Ամենակարող Աստծուն ապավինելով և Իրանի ժողովրդի աջակցությանը հույսը դնելով՝ Իրանի Իսլամական Հանրապետությունը ոչ մի պարագայում չի հանդուրժի իր տարածքային ամբողջականության, ինքնիշխանության և ազգային անվտանգության խախտումները»։
