Վտանգավոր խաղ սահմանին

ԱՄՆ Անկախության օրվա կապակցությամբ ելույթ ունենալով Երեւանում ԱՄՆ դեսպանատանը, վարչապետ Հովիկ Աբրահամյանը նշել է այդ երկրի անգնահատելի աջակցությունը Հայաստանի կյանքի բոլոր ոլորտներում:

Մասնավորապես, խոսելով ղարաբաղյան խնդրում ԱՄՆ դերի մասին, Հովիկ Աբրահամյանն ասել է. «ԱՄՆ դիրքորոշումը զինադադարի խախտումները հետաքննող մեխանիզմների ներդրման և ԵԱՀԿ գործող նախագահի անձնական ներկայացուցչի թիմի ընդլայնման հարցում կարևոր է հակամարտության հետագա սրման բացառման և խաղաղ կարգավորման գործընթացի շարունակման համար»:

Հայաստանը ապրիլյան ռազմագործողություններից հետո ԼՂ խնդրի շուրջ բանակցությունները վերսկսելու համար որպես նախապայման առաջ է քաշել հրադադարի խախտման դեպքերը հետաքննող համակարգի ստեղծումը:

Սա ամերիկյան նախաձեռնություն է, որը քննարկվել է Վիեննայում եւ ըստ ամերիկյան, ֆրանսիական ու հայկական կողմերի պնդումների՝ համաձայնություն ձեռք բերվել: Ադրբեջանը դեմ է այս մեխանիզմների ներդրմանը հասկանալի պատճառներով՝ դա ներկայիս ստատուս-քվոյի եւ ըստ էության Ղարաբաղի կարգավիճակի միջազգային որոշակի ճանաչում է, ինչը նշանակում է Ադրբեջանի քաղաքականության տապալումը:Այս իրավիճակն առաջացավ ապրիլյան ռազմագործողություններից հետո: Ադրբեջանը փորձում է տապալել այս նախաձեռնությունը եւ դուրս գալ փակուղուց: Նման իրավիճակում է հայտնվել նաեւ Ռուսաստանը, որը նույնպես դեմ է այս մեխանիզմների ներդրմանը, քանի որ այդպիսով անիմաստ է դառնում ղարաբաղյան «կարգավորման» հարցում նրա միակ շահագրգռությունը՝ ռուսական զորքի մուտքը հակամարտության գոտի:

Սանկտ Պետերբուրգում փորձ արվեց այս խնդիրը «հանել» օրակարգից, սակայն ԱՄՆ-ն ու Ֆրանսիան կոշտ հայտարարություններ արեցին այդ կապակցությամբ եւ փաստացի պնդեցին հայկական կողմի նախապայմանը:

Այսպիսով, ստացվում է ուշագրավ պատկեր՝ ԵԱՀԿ Մինսկի խմբի արեւմտյան համանախագահները պնդում են այդ մեխանիզմների ներդրումը, սակայն մյուս համանախագահ Ռուսաստանը դեմ է: Թերեւս դրանով է պայմանավորված ՌԴ ԱԳՆ կոշտ արձագանքը ԵԱՀԿ գործող նախագահ Շտայնմայերի երեւանյան այցի ժամանակ արված հայտարարություններին:

Այս պայմաններում, Հայաստանը վավերացնում է հայ-ռուսական ՀՕՊ համակարգ ստեղծելու համաձայնագիրը, որը խոշոր հաշվով ուղղված է Արեւմուտքի դեմ: Այսինքն, Հայաստանն ամեն կերպ փորձում է իրագործել հետաքննության մեխանիզմների ներդրումը, որին դեմ է Ռուսաստանը, սակայն շարունակում է կատարել Ռուսաստանի բոլոր պահանջները, մասնավորապես պաշտպանության ու անվտանգության ոլորտում:

Նյութի աղբյուրը՝ այստեղ

- See more at: http://hartak.am/arm/n-61662#sthash.FZ5zChhG.dpuf