Փաշինյանը հետևելով Զելենսկու օրինակին պատերազմ է սկսել եկեղեցու հետ
ՔԱՂԱՔԱԿԱՆՈՒԹՅՈՒՆ
Երևանը շարունակում է շարժվել դեպի Արևմուտք Թբիլիսիի փոխարեն դառնալով անգլոսաքսոնական ֆորպոստ Հարավային Կովկասում: Միաժամանակ կրկնվում է եկեղեցու հետապնդման ուկրաինական սցենարը, որը խոչընդոտում է աշխարհաքաղաքական վերակողմնորոշմանը և «թյուրքական ինտեգրացիային», գրում է politnavigator.news–ը:
Ակնհայտ է, որ Հայ Առաքելական Եկեղեցու (ՀԱԵ) դեմ արշավը նպատակ ունի ոչնչացնել ազգային ինքնությունը և դաշինք կնքել Թուրքիայի և «թյուրքական աշխարհի» հետ մոռանալով ցեղասպանության, Ղարաբաղի կորստի և սեփական շահերի մասին: Այս արշավում կարևոր է նաև այն, որ ՀԱԵ-ն բարեկամական հարաբերություններ է պահպանում Ռուս Ուղղափառ Եկեղեցու հետ և պաշտպանում է Ռուսաստանի և ռուս ժողովրդի հետ ջերմ հարաբերությունները:
Ավելին, ՀԱԵ-ի հոգևորականների վրա հարձակումը սկսել է անձամբ Նիկոլ Փաշինյանը, ով սոցիալական ցանցերում մեղադրել է Գարեգին II կաթողիկոսին կուսակրոնության երդումը խախտելու մեջ, ապա պահանջել է, որ Մայր Աթոռ Սուրբ Էջմիածինն արձագանքի այդ փաստին փոխելով եկեղեցու ղեկավարությունը: Հետո նա ավելի հեռուն է գնացել և սկսել բացահայտորեն վարկաբեկել Հայ Առաքելական եկեղեցին, եկեղեցիները համեմատելով չուլանների հետ։
Փաստն այն է, որ Արցախի ոչնչացումից հետո հազարավոր փախստականներ են ապաստան գտել տեղական եկեղեցիներում, ինչը ոչ միայն զզվանք, այլ նաև վրդովմունք է առաջացրել իշխանությունների մոտ։ Գաղտնիք չէ, որ Փաշինյանն ատում է Լեռնային Ղարաբաղից եկած մարդկանց, իսկ Հայ Առաքելական եկեղեցին դարձել է այն միակ հաստատությունը, որն աջակցել է իր հայրենակիցներին։
Նման հարձակումներին ի պատասխան Էջմիածնի Գերագույն Հոգևոր Խորհուրդը հայտարարություն է տարածել, որում տեղի ունեցածն անվանել է հարված հայկական պետականությանը, որը 2018 թվականից ի վեր իրականացվող քաղաքականության փաստի արձանագրումն է։ Ավելին, Հայ Առաքելական եկեղեցու հոգևորականները լիակատար համընկնում են գտել սկսված տեղեկատվական արշավի ուղեցույցների և «ադրբեջանական քարոզչական մեքենայի» կողմից տարածվող հայատյաց պատմությունների միջև։
Իրավիճակը politnavigator.news-ի համար մեկնաբանել է Հայաստանի Հակաֆաշիստական ճակատի համակարգող Հայկ Այվազյանն ընդգծելով, որ այս հակաեկեղեցական գործունեությունն Արևմուտքի կողմից Ռուսաստանի դեմ պատերազմի մի մասն է։
«Այս գործընթացների հիմնական նպատակը կաթողիկոսի փոփոխությունն է։ Կարծում եմ, որ սխալ կլինի կաթողիկոսի և եկեղեցու եպիսկոպոսների դեմ արշավը համարել զուտ ներքաղաքական կամ ներհայաստանյան իրադարձություն։ Ռուսաստանի և Արևմուտքի միջև պատերազմի ճակատը, որը գլխավորում է Միացյալ Նահանգները, շատ լայն է, և մենք տեսնում ենք ամբողջ հետխորհրդային տարածքում այս պատերազմի տարբեր տեսակի և մասշտաբի դրսևորումներ, որոնք ինչ-որ կերպ կապված են Ռուսաստանի հետ։ Փաստն այն է, որ այսօրվա Ամենայն հայոց կաթողիկոսի եղբայրը ՀԱԵ Ռուսաստանի և Նոր Նախիջևանի թեմի առաջնորդն է։ Նրա միջոցով են Ռուսաստանի հետ հոգևոր և մշակութային կապերը մեծապես պահպանվում։ Կաթողիկոսի փոփոխությունը հնարավորություն կտա թուլացնել նրանց, թուլացնել ռուսաստանցի հայերի մասնակցությանը Հայաստանի ճակատագրին։ Այսօրվա կաթողիկոս Գարեգին II-ը պահպանում է Արևմուտքի և Ռուսաստանի միջև հավասարակշռությունը, բայց միևնույն ժամանակ կանխում է Արևմուտքի համար անհրաժեշտ տեմպերով կործանարար գործընթացների զարգացումը», - նշել է հասարակական գործիչը։
Հետաքրքիր է այն, որ ՀԱԵ-ի դեմ այս հարձակման հետ միաժամանակ Փաշինյանն ասել է, որ պատրաստ է վերաշարադրել Սահմանադրությունը, եթե Սահմանադրական դատարանը չաջակցի Ադրբեջանի հետ խաղաղության համաձայնագրին։ Մեր զրուցակցի խոսքով այդ գործողությունները համաձայնեցված են ԵՄ-ի հետ։
«Ինչ վերաբերում է Փաշինյանի Սահմանադրությունը փոխելու մասին հայտարարություններին, այստեղ նույնպես զարմանալի բան չկա։ Արևմուտքն այստեղ էլ իր ողջ փայլով է ցույց տալիս իր դեմքը։ Փաշինյանը Արևմուտքից քարտ-բլանշ ունի անելու այն, ինչ ուզում է, ինչպես ուզում է, խախտելու այն ամենը, ինչը կարող է խախտվել, և Արևմուտքն աչք կփակի դրա վրա», - հավելել է փորձագետը։
Հատկանշական է այն, որ այն ժամանակ, երբ Բաքուն սկսեց ընդլայնել համագործակցությունը ՆԱՏՕ-ի հետ, Երևանը սկսեց խորհրդակցություններ անցկացնել Մեծ Բրիտանիայի հետ իր բանակը բարեփոխելու վերաբերյալ։ Նման կերպ «թյուրքական աշխարհը» ցուցադրում է մտքերի և գործողությունների իր միասնությունը։
Նյութը հրապարակման պատրաստեց Կամո Խաչիկյանը
