Իմպիչմենտի գործընթացը դեռ հաջողության շանսեր չունի

Իմպիչմենտի գործընթացը, որ նախաձեռնել է ԱԺ «Պատիվ ունեմ» խմբակցությունը, առայժմ լուրջ հաջողությունների հասնելու շանսեր չունի։ Հիշեցնենք, ՀՀԿ առաջարկով «Պատիվ ունեմ» խմբակցությունը որոշել էր Մասիսի քաղաքապետ Դավիթ Համբարձումյանին վարչապետի թեկնածու առաջադրել, և խմբակցությունը միաձայն որոշում է կայացրել, սատարել այս որոշումը՝ կոչ անելով ընդդիմադիր մյուս պատգամավորներին միանալ իրենց նախաձեռնությանը։ «Հայաստան» դաշինքը մինչ օրս որևէ կերպ չի մեկնաբանել Դավիթ Համբարձումյանի առաջադրումը։ Անկախ 2 պատգամավորներ, որոնց ավելի վաղ վտարել էին «Քաղպայմանագրից», Հակոբ Ասլանյանն ու Հովիկ Աղազարյանն էլ հրաժարվել են աջակցել Հանրապետականի որևէ թեկնածուի։ Ավելին, վերջին շրջանում Աղազարյանի ակտիվությունը և հայտարարությունները վկայում են, որ նա բացառապես Փաշինյանի գծի մեջ է և ցանկություն չունի որևէ կերպ աջակցել ընդդիմադիր իրական նախաձեռնություններին։

Բուն «Պատիվ ունեմ» խմբակցությունից պնդում են, թե Դավիթ Համբարձումյանն անցած տարիներին եղել է իշխանության քաղաքական ճնշումների թիրախում, բայց կարողացել է դիմագրավել։ Իհարկե, Մասիսում Համբարձումյանը բավականին լուրջ հեղինակություն ունի, իշխանություններն էլ առանձնապես նրա հետ աշխատում են գլուխ չդնել, թեև մինչ օրս քրեական գործ կա հարուցված Դավիթ Համբարձումյանի վրա։ 2019 թ․-ից նա ամբաստանյալի աթոռին է, մեղադրվում է Փաշինյանի իշխանափոխության օրերին Հանրապետության հրապարակ շտապող հանրահավաքի մասնակիցների նկատմամբ զենքով բռնություն գործադրելու համար։ Մեկ այլ՝ զանգվածային անկարգությունների դրվագով նրա դեմ հետապնդումը հանցակազմի բացակայության հիմքով դադարեցվել է։

Բայց իշխանությունը, ինչպես այլ ընդդիմադիրների, այս դեպքում ևս Դավիթ Համբարձումյանի նկատմամբ էլ դեռևս կախված է պահում իր հիմնական զենքը՝ քրեական գործեր հարուցելու հնարավորությունը և չի բացառվում, որ Հանրապետականը հենց այս կանխավարկածից ելնելով էլ առաջադրել է, որպեսզի գործող իշխանությունները զբաղված լինեն նոր ընդդիմախոսին ճնշելու գործողություններով։

Ի վերջո, հասկանալի է, որ այս պահին, եթե բարդ է Փաշինյանին տապալելը, գոնե պետք է իշխանությանը պահել լարվածության մեջ։ Թե որքանով դա կհաջողվի, բարդ է ասել, բայց հենց այս հանգամանքից է կախված Հայաստանի ապագան։ Գործող իշխանությունները չպետք է կարողանա վերարտադրվել ոչ 2026 հերթական, ոչ էլ դրանից առաջ ենթադրվող արտահերթ խորհրդարանական ընտրությունների ընթացքում։

Լուիզա Թորոսյան