Երևանում 22-ամյա երիտասարդ է դանակահարվել․ մանրամասներ

SHAMSHYAN.com-ի տեղեկություններով՝ մայիսի 24-ին արտակարգ դեպք է տեղի ունեցել Երևանում։ Ժամը 08։15-ի սահմաններում ՀՀ Ներքին գործերի նախարարության ոստիկանության համայնքային ոստիկանության գլխավոր վարչության Կենտրոնական բաժնում օպերատիվ տեղեկություն է ստացվել, որ «ձախ հետույքի կտրած ծակած վերք» ախտորոշմամբ «Աստղիկ» բժշկական կենտրոն է տեղափոխվել մի քաղաքացի, ով հայտնել է, որ վնասվածքը ստացել է պատահական թիթեղի վրա նստելու հետևանքով։

Ինչպես հայտնում է ֆոտոլրագրող Գագիկ Շամշյանը, օպերատիվորեն հիվանդանոց է մեկնել ոստիկանության Կենտրոնական բաժնի օպերատիվ խումբը, որտեղ պարզել են, որ վիրավորը Երևանի բնակիչ 22-ամյա տղա է։

Գ․ Շամշյանի տեղեկություններով՝ ոստիկանները պարզել են նաև, որ նույն օրը ժամը 04։30-ից մինչև 05։00-ն ընկած ժամանակահատվածում Ամիրյան 15 հասցեի բակում անձնական հարցերի շուրջ ծագած վիճաբանության ժամանակ Երևանի բնակիչ 21-ամյա Կ. Լ․-ն դանակով հարվածել է հիվանդանոց տեղափոխված Ն. Գ․-ի ձախ հետույքի հատվածին՝ պատճառելով մարմնական վնասվածք։ Կ. Լ․-ն մարմնական վնասվածք հասցնելու հիմնավոր կասկածով ձերբակալվել և տեղափոխվել է ոստիկանության Կենտրոնական բաժին։

Դեպքի փաստով ոստիկանության Կենտրոնական բաժնում փաստաթղթեր են կազմվել, որոնք փոխանցվել են ՀՀ Քննչական կոմիտեի Երևան քաղաքի քննչական վարչության Կենտրոն և Նորք Մարաշ վարչական շրջանների քննչական բաժին։