«Ռուսաստանը ձեզ հետ է»–ն մանկապարտեզ կկառուցի Հայաստանի մոլոկանների Ֆիոլետովո գյուղում
ՔԱՂԱՔԱԿԱՆՈՒԹՅՈՒՆ
«Ռուսաստանը ձեզ հետ է» նախագծի նախաձեռնությամբ Հայաստանի մոլոկանների Ֆիոլետովո գյուղում սկսվել է 400 քառակուսի մետր մակերեսով մանկապարտեզի շինարարությունը: Այս մասին հաղորդում է Հայաստանում «Ռուսական տան» Telegram ալիքը, գրում է lenta.ru–ն:
50 երեխայի համար նախատեսված նախադպրոցական հաստատության շինարարության մեկնարկին մասնակցել են «Ռոսսոտրուդնիչեստվո»-ի ղեկավար Եվգենի Պրիմակովը, ՀՀ-ում Ռուսաստանի դեսպան Սերգեյ Կոպիրկինը, Լոռու մարզի փոխմարզպետ Հովհաննես Ավետիսյանը, «Ռուսական մարդասիրական առաքելության» գլխավոր տնօրեն Սերգեյ Շևչուկը, «ՎՏԲ» բանկի (Հայաստան) մարքեթինգի և հասարակայնության հետ կապերի ծառայության ղեկավար Նարե Տաթևոսյանը, «Հարավկովկասյան երկաթուղի» ընկերության տնօրեն Ալեքսեյ Մելնիկովը, «Ռոսատոմ»-ի ներկայացուցիչ Վյաչեսլավ Պրոշկինը, Հայաստանում «Ռուսական տան» ղեկավար Վադիմ Ֆեֆիլովը և տեղական համայնքի ղեկավար Ալեքսեյ Չիչևը: «Ֆիոլետովոն յուրահատուկ վայր է՝ հարուստ պատմությամբ և ամուր ավանդույթներով։ Այստեղ ապրում են մոլոկաններ, ովքեր պահպանել են իրենց հավատքը, մշակույթը և բարիդրացիական ոգին։ Դուք պետք է իմանաք, որ Ռուսաստանը հիշում է ձեզ, Ռուսաստանը սիրում է ձեզ, և Ռուսաստանը անչափ գնահատում է ձեզ։ Դուք պահպանում եք մեր ավանդույթները, մեր լեզուն։ Եվ դա մեծ սխրանք է», - ընդգծել է Եվգենի Պրիմակովը։
ՀՀ-ում Ռուսաստանի դեսպան Սերգեյ Կոպիրկինի խոսքով մանկապարտեզի բացումը Ռուսաստանի հիմնական ազգային առաջնահերթությունների ցուցադրությունն է մանկության և ընտանիքի պաշտպանության հարցում։ «Վստահ եմ, որ մանկապարտեզը կդառնա մեր ընդհանուր ապագայում շատ լավ, հաջող ներդրման օրինակ։ Մոլոկան համայնքի ապագան, ՀՀ ապագան և, իհարկե, ռուս-հայ հարաբերությունների ապագան», - հավելել է նա։
Լոռու մարզի փոխնահանգապետ Հովհաննես Ավետիսյանն իր հերթին նշել է, որ ՀՀ կառավարության համար կրթական հաստատությունների զարգացմանն ու կառուցմանն ուղղված ծրագրերը առանձնահատուկ կարևորություն ունեն, և հատուկ նշանակություն է տրվում ՀՀ տարածքում բնակվող ազգային փոքրամասնությունների պայմանների բարելավմանն ուղղված ծրագրերին։
Բացի դա գրող և լրագրող Մարկ Գրիգորյանը ներկայացրել է մոլոկանների մասին հազվագյուտ գրքի վերատպությունը, գիրքը այն մասին է, թե ինչպես են նրանք ապրում, ինչի են հավատում, ինչ են փոխանցում սերնդեսերունդ։ «Եվ եթե մի օր աշխարհը մարտահրավեր նետի ձեզ, նայեք այստեղ։ ֆիոլետովոն չի տա պատրաստի պատասխան, բայց այն կհիշեցնի ձեզ, որ դուք միայնակ չեք, ձեզանից առաջ էլ կային մարդիկ, ովքեր ընտրեցին լույսը և փոխանցեցին այն», - եզրափակել է Գրիգորյանը։
Նյութը հրապարակման պատրաստեց Կամո Խաչիկյանը
