Մահացել է Սերգեյ Վարդանյանը
ՀԱՍԱՐԱԿՈՒԹՅՈՒՆ
Մահացել է արձակագիր, ազգագրագետ, բանահավաք, բանագետ, հրապարակախոս, ՀԳՄ անդամ Սերգեյ Վարդանյանը։ Այս մասին հայտնել է որդին։
«Խորը ցավով տեղեկացնում եմ, որ մահացել է սիրելի հայրս՝ Սերգեյ Վարդանյանը։
Հոգեհանգստի արարողությունը տեղի կունենա 2025 թ. մայիսի 31-ին, ժամը 17։00-20։00, «ԼյուԱր» սգո սրահի N2 սրահում (ք. Երևան, Սիլիկյան խճուղի 18, Շահումյան գերեզմանոցի հարևանությամբ)։
Հուղարկավորությունը կկայանա նույն վայրից՝ հունիսի 1-ին, ժամը 13։00։
Սերգեյ վարդանյանը ծնվել է 1952թ. նոյեմբերի 9-ին, Երևանում։
Ավարտել է ԵՄՀ բանասիրական ֆակուլտետը։ Աշխատել է գրական և պարբերական մամուլում, ՀՀ ԳԱԱ Հնագիտության և ազգագրության ինստիտուտում։ Եղել է ՀՀ կառավարությանն առընթեր կրոնի գործերի պետական խորհրդի փոխնախագահ (1991-2002թթ.)։ «Համշեն» հայրենակցական-բարեգործական ՀԿ փոխնախագահն է (1992թ.-ից), «Ձայն համշենական» թերթի գլխավոր խմբագիրը (2004թ.-ից)։ Նախաձեռնել է պատանեկան բանահավաքչական շարժում (1978թ.-ից), որին մասնակցել են Հայաստանի, Վրաստանի, Աբխազիայի, Ադրբեջանի, Լեռնային Ղարաբաղի, Նախիջևանի, Ռուսաստանի Կրասնոդարի երկրամասի հայկական դպրոցների աշակերտները և նրանց հավաքած բանահյուսական նյութերով լույս է ընծայել «Հրեղեն ձին» և «Թագավորի երազները» ժողովածուները։ Հայ ժողովրդի պատմության, մշակույթի, ազգագրության, բանահյուսության հարցեր արծարծող նրա հոդվածները թարգմանվել են անգլերեն, ռուսերեն, ֆրանսերեն, իսպաներեն, սլովակերեն, թուրքերեն։
Հայաստանի ժուռնալիստների միության անդամ է։
ԵՐԿԵՐ
- Թագավորի երազները, Եր., 2003։
- Հայաստանի մայրաքաղաքները, Եր., 1985, 1995։
- Արևածաղիկը, (մանկական պատմվածքների ժողովածու), Երևան, 1989, Ստամբուլ, 1994։
- Ձայն համշենական, հ. 3, Եր., 1989։
- Հրեղեն ձին, Եր., 1981։
ՊԱՐԳԵՎՆԵՐ
- 2012 թ. արժանացել է ՀՀ մշակույթի նախարարության Ոսկե մեդալի։
- 2012 թ. արժանացել է Երևանի քաղաքապետի Ոսկե մեդալի։
- 2009 թ. արժանացել է Համաշխարհային հայկական կոնգրեսի, Ռուսաստանի հայերի միության, ՀՀ Սփյուռքի նախարարության և Հայաստանի ժուռնալիստների միության բարձրագույն մրցանակի։
- 1995թ. «Հայաստանի մայրաքաղաքները» ուսումնասիրությունը արժանացել է Թեքեյան մշակութային միության «Հայկաշեն Ուզունյան» մրցանակի։
- 1980թ. արժանացել է Հայաստանի ժուռնալիստների միության մրցանակի։
