Ինչով է օգտակար ձկան յուղը երեխաների համար
ՖՈՏՈ
Ձկան յուղը չի կարող ամբողջությամբ փոխարինել ձկան մսին, քանի որ օմեգա-3 ճարպաթթուներից բացի ձուկը հարուստ է նաև սպիտակուցներով, որոնք շատ կարևոր են աճող մանկական օրգանիզմի համար: Սա է պատճառը, որ երեխաների սննդակարգում ձուկը պարտադիր է (շաբաթական 1-2 անգամ):
Հաճախ ձուկ չուտելը պայմանավորված է լինում դրա պատրաստման ու մատուցման ձևից, քանի որ ոչ բոլորին է հաջողվում այն իսկապես համեղ պատրաստել:
Սակայն հարկ է հիշել, որ նույնիսկ եթե երեխան սիրում է ձուկ և հաճախ է ուտում, ձկան յուղը միևնույն է ավելորդ չի լինի: Օմեգա-3 ճարպաթթուները շատ կարևոր են սրտանոթային համակարգի, նյարդային համակարգի և գլխուղեղի աշխատանքի համար: Ընդ որում՝ այդ ճարպաթթուները չեն սինթեզվում օրգանիզմի կողմից և ստացվում են միայն սննդամթերքից:
Բավարար քանակությամբ (օրական 4-8 գրամ) օմեգա-3 ճարպաթթուներ ստանում են միայն այն մարդիկ, որոնց սննդակարգի հիմնական բաղադրիչը ծովամթերքն է: Մյուսների օրգանիզմում կա օմեգա-3 ճարպաթթուների դեֆիցիտ, որից ազատվելու համար հարկավոր է ձկան յուղ ընդունել:
Ի դեպ՝ բացի ճարպաթթուներից, ձկան յուղը նաև հարուստ է A և D վիտամիններով, որոնք նույնպես շատ կարևոր են: Օրինակ՝ վիտամին A-ն շատ օգտակար է աչքերի համար, իսկ վիտամին D-ն պաշտպանում է մրսածությունից ու վարակներից:
