Հայաստանում վրդովված են ԵՄ առաքելության կողմից հայոց ցեղասպանության մասին հիշատակումը հեռացնելուց
ՔԱՂԱՔԱԿԱՆՈՒԹՅՈՒՆ
ՀՀ-ում ԵՄ առաքելության կողմից Օսմանյան կայսրությունում հայոց ցեղասպանության մասին հիշատակումը X սոցիալական ցանցի իր էջից հեռացնելը վրդովմունք է առաջացրել հանրապետության բնակիչների շրջանում, գրում է ria.ru–ն։
Օսմանյան կայսրությունում հայոց ցեղասպանության զոհերի հիշատակի օրը նշվում է ամեն տարի ապրիլի 24-ին։ Այդ օրն էլ X սոցիալական ցանցի օգտատերերը նկատել են, որ Հայաստանում ԵՄ առաքելությունը նախ օգտագործել է «ցեղասպանություն» բառը ողբերգական իրադարձությունների 110-ամյակի կապակցությամբ արված գրառման մեջ, ապա հեռացրել է իր սեփական հղումից ցեղասպանություն բառը։ «Հայոց ցեղասպանություն» տերմինը փոխարինվել է «հայ զոհեր» բառերով։
Դա դժգոհության ալիք է առաջացրել Հայաստանի բնակիչների շրջանում։ Սոցիալական ցանցի առաքելության էջում հայտնվել են զայրացած մեկնաբանություններ։
«Ինչո՞ւ ջնջեցիք նախորդ նմանատիպ գրառումը։ Ձեզ դուր չի՞ գալիս ճշմարտությունը։ Ինչո՞ւ եք փորձում թաքցնել փաստերը և մոլորեցնել ուրիշներին», - գրել է օգտատերերից մեկը։
«Դուք անամոթ վախկոտներ եք, ջնջել եք ձեր նախորդ գրառումը, որտեղ խոսում էիք հայոց ցեղասպանության մասին», - վրդովվել է մեկ այլ անձ։
«Ի՞նչի զոհեր, ԵՄ-ի՞», «Նիկո՞լն է զանգահարել», «Ինչո՞ւ եք վախենում օգտագործել ցեղասպանություն բառը, վախկոտներ», «Հայ ժողովուրդը սպասում է պարզաբանման», գրել են օգտատերերը մեկնաբանություններում։
Նույն օրը Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան հայտարարել է, որ հայոց ցեղասպանության մասին իր սեփական հրապարակումից «ցեղասպանություն» բառի հեռացումը Հայաստանում ԵՄ առաքելության կողմից ցինիզմ է և զզվելի արարք։
Հիշեցնենք, որ հունվարին ԵՄ խորհուրդը երկու տարով՝ մինչև 2027 թվականի փետրվարի 19-ը, երկարաձգել է Հայաստանում Ադրբեջանի հետ սահմանին գտնվող քաղաքացիական դիտորդական առաքելության մանդատը, որի բյուջեն 44 միլիոն եվրո է։ Ընդհանուր առմամբ, առաքելության մեջ աշխատում է մոտ 200 անձ՝ օտարերկրացի և տեղացի վարձու աշխատողներ։
19-րդ դարի վերջին - 20-րդ դարի սկզբին Օսմանյան կայսրությունը պարբերաբար հալածել և հետապնդել է հայերին։ Մասնավորապես, 1915 թվականին, մի շարք պատմաբանների տվյալներով, սպանվել է ավելի քան 1,5 միլիոն հայ։ Օսմանյան կայսրությունում հայերի ցեղասպանության փաստը ճանաչվել է 23 պետության, ինչպես նաև Եվրոպական խորհրդարանը և Եկեղեցիների համաշխարհային խորհրդը։ 1995 թվականին ՌԴ Պետական դուման ընդունել է «Հայ ժողովրդի 1915-1922 թվականներին իրենց պատմական հայրենիքում՝ Արևմտյան Հայաստանում, ցեղասպանության դատապարտման մասին» բանաձևը։
Մարտին Հայաստանի վարչապետ Նիկոլ Փաշինյանը վերահաստատել է արտաքին գործերի նախարար Արարատ Միրզոյանի այն հայտարարությունը, որ հայոց ցեղասպանության ճանաչման հարցը չի հանդիսանում Երևանի համար արտաքին քաղաքականության առաջնահերթություն:
Թուրքիան ավանդաբար մերժել է հայերի դեմ ցեղասպանության մեղադրանքները և չափազանց զգայուն է այդ հարցի վերաբերյալ քննադատության նկատմամբ: Անկարան պնդում է, որ պետք է հրաժարվել «ցեղասպանություն» տերմինից 1915 թվականի իրադարձությունների կապակցությամբ, քանի որ զոհեր են եղել և՛ հայերից, և՛ թուրքերից: Թուրքիան նաև կոչ է արել ստեղծել պատմաբանների միջազգային հանձնաժողով երկրի արխիվներն ուսումնասիրելու և Առաջին համաշխարհային պատերազմի իրադարձությունների նկատմամբ օբյեկտիվ մոտեցում մշակելու համար:
Նյութը հրապարակման պատրաստեց Կամո Խաչիկյանը
