Ինչո՞ւ եք երիկամների հիվանդություն ունեցողին սահման տարել. հանկարծամահ եղած Սուրենի մայրը բողոքում է
ՊԱՏՄՈՒԹՅԱՆ ԱՅՍ ՕՐԸ
News.am-ը գրում է.
ԼՂՀ ՊԲ հարավարեւելյան ուղղությամբ տեղակայված զորամասերից մեկի կրակային դիրքում մայիսի 29-ին հանկարծամահ եղած 19-ամյա Սուրեն Մոսիյանի մայրը պահանջում է պատասխանատվության ենթարկել այն մարդկանց, որոնք իր տղային հիվանդ վիճակում զորակոչել են բանակ:
Տիկին Անժելայի խոսքով` որդու մահվանից արդեն մեկ ամիս է անցել, բայց իրավապահ մարմինները դեռ ոչինչ չեն անում՝ իր որդու մահվան մեղավորներին պատասխանատվության ենթարկելու համար. «Մինչեւ վերջ բողոքելու եմ, եթե պետք լինի, ես մինչեւ վերջ կգնամ: Իմ երեխան հայրենիքի համար ծառայելու ժամանակ է մահացել, որովհետեւ նրան բազմաթիվ հիվանդություններով տարել են բանակ: Պահանջելու եմ, որ պատասխանատվության ենթարկվեն նրանք, որոնք մեղավոր են, որ իմ որդին այդքան հիվանդություններ ունենալով հանդերձ զորակոչվել է բանակ:
Հիվանդ երեխուն հանել ուղարկել են սահման, դիրքեր, ո՞վ է սրա համար պատասխանը տալու, ինձ էլ ասում են, որ երիկամների ազոտն է բարձրացել, սրտի ինֆարկտ է ստացել ու մահացել է: Բայց դուք ինչի՞ եք երիկամաների հիվանդություն ունեցողին սահման տարել: Մահվան վկայականում գրված է, որ թոքերի հիվանդությունից է մահացել, բայց աֆիցերների հետ խոսել եմ, ասել են, որ երիկամներից է մահացել»,-ասաց տիկին Անժելան:
Մահացած զինծառայողի մայրը նշեց, որ Սուրենը նաեւ ողնաշարի ճողվածք է ունեցել, որի հետեւանքով էլ ծառայության ընթացքում 4 անգամ պառկել է հոսպիտալում. «Ողնաշարի գրիժա է ունեցել նաեւ ու դա իմանալով տարել են դիրքեր, ստիպել են, որ կառաուլ կանգնի: Բողոքում էր ինձ, ասում էր՝ մամա ողնաշարս ցավում ա, մամա ես չգիտեմ ոնց կանեմ, ոնց եմ դիմանալու, մինչեւ որ այնքան արեցին՝ մահացավ...»:
Հիշեցնենք, որ Սուրեն Մոսիյանը Բաքվից գաղթած փախստականի ընտանիքից էր։ Սուրենն իր մոր, եղբոր ու քրոջ հետ բնակվում է Արարատի մարզի Արտաշատ քաղաքում՝ սոցիալապես ծանր պայմաններում։ Նա ընտանիքի կրտսեր երեխան էր։
Ավելի վաղ տեղեկացրել էինք, որ մայիսի 29-ին` ժամը 22:00-ի սահմանում, ՊԲ հարավարեւելյան ուղղությամբ տեղակայված զորամասերից մեկի կրակային դիրքում հանկարծամահ է եղել զինծառայող, 1997թ. ծնված Սուրեն Արմենի Մոսիյանը:
Զինծառայողի մահվան հանգամանքները պարզելու համար կատարվում է քննություն:
