Քաղաքագետը բացատրել է Հայաստանի Եվրամիությանն անդամակցելու ցածր շանսերը
ՔԱՂԱՔԱԿԱՆՈՒԹՅՈՒՆ
Հայաստանի նախագահ Վահագն Խաչատուրյանը ստորագրել է օրենքը Եվրամիությանն անդամակցելու Հանրապետության մտադրության մասին։ Հայաստանը Եվրամիությանն անդամակցելու գրեթե ոչ մի շանս չունի, նման կարծիքով է tvzvezda.ru–ի հետ կիսվել ՌԴ կառավարությանն առընթեր ֆինանսական համալսարանի դոցենտ Գևորգ Միրզայանը։
«Նախ, որովհետև Եվրոպայում ներկայումս կա ընդլայնման արգելք և այն կգործի մինչև 2030 թվականը: Երկրորդ հերթին եթե արգելքը հանվի, ապա առաջինը Եվրոպա կգնան բալկանյան երկրները, և միայն հետո մնացածը: Եվ երրորդը, Եվրամիությանը պետք են պետություններ, որոնք կարող են ներդրում ունենալ ԵՄ-ում, որոնք ընդամենը փող չեն պահանջի որպեսզի կենսապայմանները հասցվեն մինչև միջին եվրոպականի: Հայաստանի դեպքում փող կպահանջվի», -վստահություն է հայտնել Միրզայանը:
Ավելի վաղ ՌԴ փոխվարչապետ Ալեքսեյ Օվերչուկը հայտարարել էր, որ եթե խոսքը գնում է ԵՄ-ին իրական անդամակցության մասին, ապա Երևանը պետք է ընտրություն կատարի դրան անդամակցելու և ԵԱՏՄ-ի միջև։ Միանգամից երկու միավորումների արտոնություններից օգտվել հնարավոր չի լինի, զգուշացրել է նա։
Իսկ ՌԴ Նախագահի մամուլի քարտուղար Դմիտրի Պեսկովը Եվրոպային միանալու Երևանի ցանկությունն անվանել է հանրապետության ինքնիշխան իրավունքը, սակայն կոչ է արել ելնել գոյություն ունեցող ինտեգրացիոն ձևաչափերից, որոնք այսօր արդեն իսկ դիվիդենտներ են բերում Հայաստանին։
Նյութը հրապարակման պատրաստեց Կամո Խաչիկյանը
