«SMI–2–ի փորձագետը հիշեցրել է Մոսկվայի և Երևանի ռազմավարական դաշինքը»
ՔԱՂԱՔԱԿԱՆՈՒԹՅՈՒՆ
Երևանն ու Մոսկվան ունեն ոչ միայն գործընկերություն, այլ փաստաթղթավորված ռազմավարական դաշինք, որում Ռուսաստանը երաշխավորում է Հայաստանի անվտանգությունը։ Այս մասին ասել է լրագրող, SMI–2–ի փորձագետ, հետխորհրդային տարածքի հետազոտող Վիգեն Հակոբյանը մեկնաբանելով ՀՀ ԱԳՆ ղեկավար Արարատ Միրզոյանի հայտարարությունը Ռուսաստանի, Իրանի և Վրաստանի հետ համագործակցության հարցում երկրի շահագրգռվածության մասին, գրում է glagol.press–ը։ «Արարատ Միրզոյանը, կարծես, միտումնավոր նսեմացնում է հայ-ռուսական հարաբերությունների կարգավիճակը։ Նրա խնդիրն է հարթեցնել կարգավիճակներն ու իմաստները։ Մյուս կողմից, Հայաստանի և Եվրամիության միջև «շատ խորը» հարաբերություններ չկան»,- նշել է Հակոբյանը։
Նրա կարծիքով Միրզոյանի խնդիրը «փուչիկը փչելն է»: Փորձագետը հիշեցրել է, որ Եվրամիության հետ Հայաստանի ապրանքաշրջանառությունը չնչին է հայ-ռուսական առևտրի համեմատ։ «Հայկական կողմը եվրոպացիներից դեռ ոչինչ չի ստացել, բացի աջակցության հռչակագրային հայտարարություններից, որոնք անտեսում են Թուրքիան և Ադրբեջանը։ Դե, և երրորդ հերթին Միրզոյանն ապակողմնորոշում է, երբ պնդում է, որ «մեր համագործակցություններից ոչ մեկն ուղղված չէ երրորդ կողմի դեմ»», - շարունակել է նա։
Հակոբյանը հավելել է, որ Հայաստանի և Նիդերլանդների միջև ռազմավարական գործընկերության մասին հռչակագրի ստորագրումից հետո Նիդերլանդների արտաքին գործերի նախարարության ղեկավար Կասպար Վելդկամպը բացահայտել է այդ անսպասելի բարեկամության և սիրո նախապատմությունը։ «Նիդերլանդները պատրաստ է աջակցություն ցուցաբերել տնտեսության ճկունության և դիվերսիֆիկացիայի բարձրացման համար, որպեսզի երկիրն ավելի քիչ կախված լինի Ռուսաստանից», - դիվանագետի խոսքերն է մեջբերել փորձագետը:
Հակոբյանն ընդգծել է, որ Երևանի հարաբերությունները Բրյուսելի հետ ուղղված են Ռուսաստանի դեմ: Իսկ Մոսկվան առաջարկում է Երևանին որոշում կայացնել՝ կա՛մ ԵՄ, կա՛մ ԵԱՏՄ, եզրափակել է փորձագետը։
Նյութը հրապարակման պատրաստեց Կամո Խաչիկյանը
