«Հետույք մտնելու» արվեստը՝ ՀՖՖ նախագահի կատարմամբ

Թե քաղաքական վերլուծաբանները, և թե նույնիսկ մարզական աշխարհը ցնցված են օրերս Իջևանում Վովա Փաշինյանի ծննդյան 85-ամյակին նվիրված հուշամրցաշարի անցկացման փաստից։ ՀՀ վարչապետի պաշտոնը զբաղեցնող անձի հայրը, իհարկե, ինչ-որ չնչին առնչություն ունի ֆուտբոլի հետ։ Ժամանակին, ասում են, նույնիսկ մարզիչ է եղել, սակայն որևէ հուշամրցաշարի արժանանալու իրավունք, կարծես թե, չունի։ Մրցաշարը կազմակերպվել էր Հայաստանի ֆուտբոլի ֆեդերացիայի և նրա նախագահ Արմեն Մելիքբեկյանի կողմից, և լուրջ միջոցներ են ծախսել նման միջոցառում կազմակերպելու, դրան Նիկոլ Փաշինյանին հրավիրելու համար։

Հայաստանի ֆուտբոլի ֆեդերացիայում խնդիրները բազմաթիվ են։ Արմեն Մելիքբեկյանի գլխին էլ մութ ամպեր են կուտակվել, և չի բացառվում, որ տարբեր ֆուտբոլային ակումբների և երկրպագուների բողոքի ֆոնին իշխանությունները ստիպված լինեն հրաժարվել Մելիքբեկյանի կասկածելի ծառայություններից և պարտադրել նրան հրաժարական տալ։ Եվ Մելիքբեկյանը Փաշինյանին հաճոյանալու այլ ավելի ուշագրավ մեթոդ չէր գտել, քան նրա հոր անունով հուշամրցաշար կազմակերպելը։

Ավելին, ըստ մեր աղբյուրների, տևական ժամանակ Մելիքբեկյանը փորձել է անձամբ հանդիպել Նիկոլ Փաշինյանի հետ, նրա հետ քննարկել իր ապագան և այլ անելիքներ, բայց Փաշինյանը երկար խուսափել է, իսկ այսպես Մելիքբեկյանի համար հնարավորություն էր ստեղծվել նստել Նիկոլ Փաշինյանի կողքին, նրա հետ որոշ հարցեր քննարկել, ինչու ոչ, մրցաշարից հետո մեկ-երկու բաժակ խմել և համոզել իրեն տեր կանգնել։ Ի դեպ, մեր աղբյուրի փոխանցմամբ, Մելիքբեկյանին նման միտք տվողը նրա այս տեղակալն է` Արմեն Նիկողոսյանը, որը ժամանակին եղել է Նիկոլ Փաշինյանի թերթի մարզական լրագրողը և մինչ օրս էլ հենց նա է պահպանում կապն իշխանությունների հետ։

Ալլա Տիգրանյան