Վաղ թե ուշ գալու է պատասխան տալու ժամանակը

Արցախի նախկին պետնախարար, բարերար Ռուբեն Վարդանյանի ուղերձը Բաքվի բանտից իսկական ցնցումներ է առաջացրել Հայաստանի գործող իշխանության մեջ։ Վարդանյանը մեկուսարանից ընտանիքի միջոցով աուդիոուղերձ էր հղել և նշել` ինքը զոհ չէ ու իրեն պետք չէ խղճալ։ «Կուզենայի, որ մենք երբեք չհիասթափվեինք և չտրվեինք հուսալքությանը, դա մեր ապագայի հիմքն է, այդ իսկ պատճառով ես գնահատում եմ այն շանսը, որ ինձ տրվել է: Ես կանեմ ամեն ինչ, ինչ կարող եմ և կշարունակեմ անել, ինչ կարող եմ: Համոզված եմ, որ ամեն ինչ լավ է լինելու: Կարծում եմ, որ այն, ինչ անում եմ, ճիշտ է, քանի որ դա միակ ճանապարհն է դուրս բերելու ձեզ այն անտարբերությունից, որում գտնվում եք»,- նշել էր նա։

Վարդանյանի այս ուղերձը հուզել, ստիպել է մտածել հասարակության մեծ մասին, իսկ անտարբերությունը հաղթահարելու նրա կոչը կարող է համախմբման առանցք դառնալ։ Մինչ հանրությունը ցավով ու հուսահատությամբ լսում կամ ընթերցում էր Ռուբեն Վարդանյանի կոչը, ՔՊ-ականներին հանձնարարել էին ցույց տալ իրենց անհոգությունը, լուսանկարներ հրապարակել ռեստորաններից և գինետներից, կարծես, ոչինչ տեղի չի ունեցել։ Նիկոլ Փաշինյանը հրաշալի հասկանում է, որ միայն գերիներին Բաքվում թողնելով, նրանց ազատման համար քայլ չձեռնարկելով վտանգն իրենից չի հեռացնելու։ Ուստի և, ամեն բան անում է՝ ՀՀ քաղաքացիներին ապացուցելու, թե ոչինչ էլ չի եղել։

ՔՊ-ական տարբեր պաշտոնյաներ՝ երջանիկ ժպիտներով լուսանկարներ էին հրապարակում՝ բնականաբար արժանանալով օգտատերերի հայհոյախառն մեկնաբանություններին։ Այս վիճակը, ի դեպ, նույն այդ ՔՊ-ականներին դուր չի գալիս, որքան էլ կտրվել են իրականությունից, հրաշալի հասկանում են, որ վաղ թե ուշ գալու է պատասխան տալու ժամանակը։ 

Անահիտ Սարգսյան