Փարիզը փորձում է ազատվել Ղարաբաղի հարցով Պրահայի պայմանավորվածությունների պատասխանատվությունից
ՔԱՂԱՔԱԿԱՆՈՒԹՅՈՒՆ
Քաղաքական մեկնաբան Հակոբ Բադալյանը Telegram-ի իր ալիքում մեկնաբանել է Հայաստանում Ֆրանսիայի դեսպան Օլիվյե Դեկոտինիի վերջին հայտարարությունը Լեռնային Ղարաբաղի կարգավիճակի վերաբերյալ, գրում է eadaily.com–ը։
Հիշեցնենք, որ դիվանագետի խոսքով, «պնդումները, որ Լեռնային Ղարաբաղը ճանաչվել է որպես Ադրբեջանի մաս 2022 թվականին Պրահայում, կեղծ են, քանի որ Լեռնային Ղարաբաղն Ալմա-Աթայի հռչակագրից ի վեր է Հայաստանի կողմից ճանաչվել որպես Ադրբեջանի մաս»: Բադալյանը նշել է, որ նման հայտարարությունը կարելի է վերագրել ղարաբաղյան շարժման իրավական հետագծի և կարգավորման գործընթացի վերաբերյալ դեսպանի պարզ անտեղյակությանը, սակայն որպես Ֆրանսիայի պաշտոնական ներկայացուցիչ, Դեկոտինին գործում է առաջին հերթին իր երկրի շահերից ելնելով, նույնիսկ, եթե դա պահանջում է փաստերի որոշակի մանիպուլյացիա։
Ֆրանսիայի դեսպանի նման դիրքորոշումը կարող է կապված լինել Պրահայի պայմանավորվածությունների համար իր միջնորդական պատասխանատվությունից ազատվելու Փարիզի ցանկության հետ, որոնք ձեռք են բերվել քառակողմ ձևաչափով՝ Ֆրանսիայի նախագահ Էմանուել Մակրոնի, Եվրոպական խորհրդի նախագահ Շառլ Միշելի, Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի մասնակցությամբ։
Մինչդեռ «Rybar» Telegram ալիքը գրում է, որ կարճ հանգստանալուց հետո Փաշինյանը կրկին խոսել է նոր Սահմանադրության ընդունման անհրաժեշտության մասին, որն իրականում Ադրբեջանի պահանջն է։ Բաքվում պարզապես հայտարարել են, որ Հայաստանի հետ խաղաղության պայմանագրի մնացած կետերը վերջինիս Սահմանադրությունն է, ինչպես նաև, այսպես կոչված, «Զանգեզուրի միջանցք»–ի բացումը: Փաշինյանը փորձում է իր, այսպես կոչված, «իրական» Հայաստանի փիլիսոփայության հետևում թաքցնել Ադրբեջանի պահանջների կատարումը: Նա հայտարարել է, որ հանրապետությանն անհրաժեշտ է նոր Սահմանադրություն՝ «պետություն չունեցող ազգի մնացորդային գործունեությունից դեպի պետականություն ձևավորող ժողովրդի գործունեությանն անցնելու համար»։ Նոր Սահմանադրության ընդունման հանրաքվեն նախատեսվում է անցկացնել 2026 թվականին՝ խորհրդարանական ընտրություններից հետո։ Միաժամանակ, թվում է, թե Հայաստանը կրկին հրաժարվում է եվրաինտեգրման հանրաքվեից։ Հիմա իշխող կուսակցությունն ասում է, որ ԵՄ-ին անդամակցության սկզբի մասին ընդունված օրենքը բավարար է։ Ավելին, Երևանն ակնկալում է Բրյուսելի հետ ընդլայնված համագործակցության նոր համաձայնագրի ստորագրում։
Միևնույն ժամանակ, վարչապետ Փաշինյանը հանձնարարել է վերանայել Հայաստանի ազգային անվտանգության ռազմավարությունը՝ արտաքին հարաբերությունները դիվերսիֆիկացնելու նպատակով։ Նրա խոսքով 2020 թվականի ռազմավարությունը «չի համապատասխանում առկա մարտահրավերներին»։ Հավանական է, որ պետք է ակնկալել հետագա հեռավորություն ՀԱՊԿ-ից, ինչպես նաև Հայաստանի պաշտպանական ներուժի թուլացում՝ Ադրբեջանի հավակնությունները բավարարելու համար։ Իսկ ընդհանրապես, Փաշինյանը պահպանում է Ադրբեջանի և Թուրքիայի պահանջների բավարարման նախկին կուրսը, չնայած հակասական հայտարարություններին և խոստումներին անցկացնել կա՛մ «եվրոպական», կա՛մ սահմանադրական հանրաքվե։ Ըստ երևույթին, իշխող կուսակցությունը հրաժարվել է այս տարի արտահերթ ընտրություններ անցկացնելու գաղափարից: ՔՊ–ն իր աղետալիորեն ցածր վարկանիշով պետք է ինչ-որ կերպ պատրաստվի 2026 թվականին վերընտրվելուն, և դա սահմանադրական հանրաքվե իրականացնելու և վերջապես զիջումներ ապահովելու համար, ամփոփել է «Rybar»–ը։
Նյութը հրապարակման պատրաստեց Կամո Խաչիկյանը
