Ռուսաստանին մնացել է միայն սպառնալու տարբերակը

Ռուսաստանի փոխվարչապետ Ալեքսեյ Օվերչուկը լրագրողներին ասել է, որ Երևանը հասկանում է, որ Եվրամիությանը հնարավոր անդամակցումը կբերի Հայաստանի դուրս գալուն Եվրասիական տնտեսական միությունից և այդ շուկայի կորստին։ «Որոշումն այստեղ բացարձակ ակնհայտ է։ Շուկաների բացումը ԵՄ հետ կնշանակի շուկաների փակումը ԵԱՏՄ հետ։ Հակառակ դեպքում կտուժեն մեր արտադրողները Եվրասիական տնտեսական միությունում, դա ակնհայտ է», - ընդգծել է Օվերչուկը, հավելել, թե Հայաստանի համար «ԵՄ-ի հետ ներմուծման մաքսատուրքերի զրոյացումն ավտոմատ կերպով կնշանակի վերադարձ մաքսային և մաքսային սակագների ԵԱՏՄ-ի հետ»։ «Մեզ համար, իհարկե, սա ազդանշան է, որ Եվրոպական միությանը միանալու սկիզբը ԵԱՏՄ-ից դուրս գալու սկիզբն է», - նշել է Օվերչուկը։

Նա վստահ է, որ «սա բացարձակ ակնհայտ է յուրաքանչյուր մարդու համար, ով թեկուզ մի փոքր ծանոթ է այս երկու ինտեգրացիոն միավորումների կառուցվածքին»։ «Այստեղ հայկական կողմը հստակ գիտի, որ հետևանքները կլինեն այսպիսին։ Այստեղ ոչ ոք չպետք է ունենա որևէ պատրանք», - ընդգծել է փոխվարչապետը։

Ռուսաստանից հնչող զգուշացումները գնալով ավելի կոշտ են դառնում։ Մոսկվան, թերևս, ՀՀ իշխանությունների՝ դեպի Արևմուտքը սլացքն առանձնապես լուրջ չի համարել, իսկ այսօր, երբ կառավարությունը հավանություն է տվել ԵՄ անդամակցության մեկնարկի օրինագծին, ԱՄՆ հետ ռազմավարական գործընկերության խարտիա ստորագրել, Ռուսաստանին մնում է միայն կոշտ զգուշացումների գործիքը։ Թե որքանո՞վ այդ գործիքը կարող է արդյունավետ լինել, ցույց կտա ժամանակը։ 

Ալլա Միքայելյան