Թրամփը ցանկանում է Գազայի հատվածում ապրող ավելի քան 1 մլն պաղեստինցու «ժամանակավորապես» բնակեցնել Հորդանանում և Եգիպտոսում
ՖՈՏՈ
ԱՄՆ նախագահ Դոնալդ Թրամփը հայտնել է, որ խոսել է Հորդանանի թագավորի հետ՝ քննարկելով Գազայի հատվածից ավելի քան 1 մլն պաղեստինցիների հարևան երկրներ տեղափոխելու և այնտեղ նրանց համար բնակարաններ կառուցելու հնարավորությունը: Այս մասին գրում է CNN-ը:
Թրամփի խոսքով՝ ինքը Հորդանանի միապետ Աբդալլահ Երկրորդին՝ տարածաշրջանում ԱՄՆ-ի առանցքային գործընկերոջը, խնդրել է ընդունել ավելի շատ պաղեստինցիների:
«Ես ասացի նրան, որ կցանկանայի, որ ավելի շատ (պաղեստինցիների) ընդունեին, քանի որ ես հիմա նայում եմ ամբողջ Գազայի հատվածին, և այնտեղ խառնաշփոթ է, իսկական խառնաշփոթ», - ասել է Թրամփը լրագրողներին:
ԱՄՆ նախագահի խոսքով՝ ինքը կցանկանար, որ և՛ Հորդանանը, և՛ Եգիպտոսը, որը սահմանակից է անկլավին, ընդունեն պաղեստինցիներին: Նա հավելել է, որ կիրակի կխոսի Եգիպտոսի նախագահ Աբդել Ֆաթահ ալ Սիսիի հետ այդ հարցի շուրջ:
«Խոսքը 1,5 միլիոն մարդու մասին է, և մենք պարզապես մաքրում ենք այդ ամբողջը... Ես չգիտեմ, ինչ-որ բան պետք է արվի. հիմա այնտեղ (Գազայի հատվածում) փլատակներ են: Գրեթե ամեն ինչ քանդված է, մարդիկ մահանում են: Ես կցանկանայի՝ արաբական որոշ պետություններում կառուցվեին բնակարաններ, որտեղ, կարծում եմ, պաղեստինցիները կարող էին խաղաղ ապրել», - ասել է ԱՄՆ նախագահը:
Թրամփն ընդգծել է, որ հարևան երկրներում պաղեստինցրիների բնակեցումը «կարող է լինել ժամանակավոր կամ երկարաժամկետ»:
Ինչպես նկատում է աղբյուրը, Իսրայելի և պաղեստինյան ՀԱՄԱՍ խմբավորման միջև 15-ամսյա պատերազմը Գազայի հատվածի մեծ մասը վերածել է փլատակների։ Իսրայելի օդային հարվածները, ըստ ՄԱԿ-ի, վնասել կամ ավերել են անկլավի շենքերի մոտ 60 տոկոսը, ներառյալ դպրոցներն ու հիվանդանոցները, ինչպես նաև տների մոտ 92 տոկոսը: Գազայի բնակիչների մոտ 90%-ը տեղահանվել է, և շատ բնակիչներ ստիպված են եղել բազմիցս տեղափոխվել, ոմանք ավելի քան 10 անգամ:
