Կլինեն իմ աչքերն ու ականջները. Թրամփը դերասաններ Ջոն Վոյթին, Մել Գիբսոնին, Սիլվեստր Ստալոնեին նշանակել է Հոլիվուդում իր դեսպաններ
ՄՇԱԿՈՒՅԹ
ԱՄՆ նորընտիր նախագահ Դոնալդ Թրամփը հայտնի կինոաստղեր Սիլվեստր Ստալոնեին, Մել Գիբսոնին և Ջոն Վոյթին նշանակել է Հոլիվուդում հատուկ դեսպաններ՝ նպատակ ունենալով ժամանացի ոլորտը դարձնել «ավելի ուժեղ, քան երբևէ»: Այս մասին գրում է golosameriki.com-ը:
Օսկարակիր դերասանները Հոլիվուդում առանձնանում են, քանի որ նրանց հայացքները տարբերվում են գործընկերների մեծ մասի տեսակետներից: Վերջիններս ավանդաբար աջակցում են Դեմոկրատական կուսակցությանը, մինչդեռ Թրամփի ընտրած եռյակն ավելի պահպանողական հայացքներ ունի: Հանրապետականներն ավանդաբար աջակցություն չեն վայելում ժամանցի արդյունաբերության ոլորտում, և շատ աստղեր, օրինակ՝ Թեյլոր Սվիֆթը և Ջորջ Քլունին, ընտրություններում սատարում են դեմոկրատներին:
«Ինձ համար պատիվ է հայտարարել, որ Ջոն Վոյթը, Մել Գիբսոնը և Սիլվեստր Ստալոնեն կծառայեն որպես հատուկ դեսպաններ խնդրահարույց Հոլիվուդում: Նրանք կլինեն իմ հատուկ ներկայացուցիչները, որպեսզի վերադարձնեն Հոլիվուդը, որը վերջին չորս տարիների ընթացքում շատ բիզնեսներ է կորցրել օտարերկրյա մրցակիցների պատճառով: Այս 3 անհավանական տաղանդավոր մարդիկ կլինեն իմ աչքերն ու ականջները, և ես կանեմ այն, ինչ նրանք առաջարկեն: Կսկսվի Հոլիվուդի ոսկե դարը», - գրել է Թրամփը իր Truth Social հարթակում:
